Միավորման գործընթացներին չպետք է նայել բացասաբար, պետք է մտածել` գնում ենք լավ բանի. Վահե Բուդումյան

Yerkir.am-ը  զրուցել է մշակույթի փոխնախարար Վահե Բուդումյանի հետ մշակույթի նախարարության միավորման, լավագույն կադրերին պահելու խնդրի և հարակից այլ հարցերի շուրջ:

- Կառավարության կառուցվածքային փոփոխություններն օրեր առաջ գործադիրի հավանությանն արժանացան, ըստ որոնց` մշակույթի նախարարությունը միավորվել է կրթության, գիտության և սպորտի նախարարությանը: Ձեր անձնական տեսակետն է հետաքրքրում` կարելի՞ էր միավորել մշակույթի նախարարությունն այլ նախարարության հետ:

- Անձնական տեսակետ հայտնել, իհարկե, դժվար է, որովհետև մենք նախ  քաղաքական թիմի անդամ ենք (խոսքն այն մարդկանց մասին է, որոնք կուսակցության անդամ են): Բացի այդ` մենք առանձին նախարարությունների ներկայացուցիչներ ենք, որոնք, ինչ-որ իմաստով, իրար հակադրվող ուժերի արանքում են հայտնվել: Ես, իհարկե, անձնական տեսակետ չեմ կարող հայտնել` որպես քաղաքացի, բայց, որպես փոխնախարար, կարող եմ ասել, որ պետք է կարևորել մշակույթի նախարարության լիազորությունների շրջանակները: Ինչո՞ւ եմ սա հատկապես շեշտում, որովհետև, իմ տպավարությամբ, դա քիչ քննարկվեց, իսկ օրենքի նախագիծը գոնե նախնական տարբերակով վերաբերում էր նաև այս լիազորություններին: Այսինքն` առաջին հերթին` հասկանալ, թե ի՞նչ լիազորությունների շրջանակ է վերապահվելու նախարարությանը` անկախ հանգամանքից, թե  միավորվո՞ւմ է այլ գերատեսչության հետ, թե՞ ոչ: Եվ երկրորդ` կարևոր հանգամանք է այն, թե պետությունն ինչքան գումար է հատկացնում մշակույթին: Սրանք կարևոր երկու հարցեր են, որոնք, չնայած կարևորությանը, քիչ քննարկվեցին:

-Մտավախություն չունե՞ք, որ այլ նախարարության հետ միավորվելուց հետո առանց այն էլ ոչ բավարար բյուջեն կրճատվելու է:

- Ես լսել եմ, գիտեմ, որ մարդիկ դժգոհություններ և  մտավախություններ  ունեն այդ հարցի առնչությամբ, և երբ ցույց եղավ ընդդեմ այս միավորման, մտավախությունը նաև դա էր, որ բյուջեն կկրճատվի: Բայց դա չի քննարկվել, գոնե ես տեղյակ չեմ որևէ փաստաթղթի մասին: Նշեմ, որ առաջին փոփոխություններով նախատեսված գործընթացները մեխանիկական են լինելու, այսինքն` բյուջետային, աշխատանքային փոփոխություններ չեն լինելու: Ձեր հարցի պատասխանն այս պահին չկա:

 - Կառավարման մասագետներն ասում են, թե նախարարություններն իրար միացնելուց առաջ նախ պետք էր հասկանալ առանձին գերատեսչությունների կարգավիճակը, իրար միացնելու, իրար հետ համագործակցելու անհնարինությունը, ապա նոր գնալ այդ քայլին:

- Եթե ճի՞շտ եմ հասկանում` խոսքն այն մասին է, որ կառավարության կառուցվածքը փոխելու համար նախ պետք է տեսլական ունենալ, հետո նոր գնալ դրան: Այն, ինչ տեղի է ունենում, կարծես, ձեր ասածին չի հակադրվում: Տեսլական ունենալն ու դրան գնալը մի բան է, քայլերի հաջորդականությունը` բոլորվին այլ: Առաջին քայլը պետք է լինի մեծ մոդելով փոփոխությունը, այնուհետև` կառուցվածքային ավելի մանր փոփոխությունը, ինչը չի առնչվում տեսլական ունենալուն կամ չունենալուն:

-Մեխանիկական միավորումից հետո հնարավոր է պարզ դառնա, որ դա լավագույն լուծումը չէր, այդ դեպքում ի՞նչ է անելու պետությունը:

- Իհարկե, միշտ էլ կարող են բացասական արդյունքներ լինել: Բնականաբար, եթե արդյունքները բացասական լինեն, ու կառավարման հետ խնդիրներ առաջանան, կարելի է մտածել նախնականին նման մոդելի անցնելու մասին: Բնականաբար, եթե գնացել ես նման քայլի, ուրեմն կա տեսլականը, թե ինչ ճանապարհով ես գնում, այսինքն` պատկերացում ունես, որ վերջնարդյունքը դրական է: Կան մարդիկ, որոնք աշխատել են այս փաստաթղթի վրա, այս փաթեթի հետ և համոզված են, որ կառավարման արդյունավետության տեսանկյունից հասնելու ենք լավ արդյունքի:

- Օրինակ` ֆինանսական ու իրավաբանական բաժինների լավագույն մասնագետները, հոգնելով անորոշությունից, ինքնակամ դուրս կգան ոլորտից, ինչի հետևանքով գերատեսչություններում կմնան ոլորտի` ոչ այնքան կոմպետենտ մասնագետները:

-Միավորման առաջին փուլում կրճատումներ չեն նախատեսվում:

- Առաջին փուլից հետո կգա երկրորդ փուլը, երրորդը, չորրորդը...

- Եթե խոսքը նախնական տրամադրվածության մասին է, ապա այժմ նման մտավախություն չկա, թե կարող են դուրս մնալ համակարգից:

-Մարդիկ արդեն իսկ ունեն այդ մտավախությունը, ու դա տրամաբանական է:

-Այսինքն` դուք տեղյա՞կ եք նման գործընթացներից, որ մարդիկ դուրս են գալիս նախարարությունից:

- Մարդիկ նախարարությունից դուրս չեն գալիս, պարզապես մտավախություն ունեն, որ այս անորոշությունը կարող է երկար ձգվել, ու, այս պահից սկսած, իրենց գլխի ճարն են տեսնում: Իհարկե, մեխանիզմներ կան, որ հնարավորություն կտան պարզելու, թե, օրինակ, ֆինանսական երկու բաժիններից որ մեկի մանսագետներն են ավելի լավը, բայց որակյալ կադրերը կարող են և չսպասել:

-Դուք իմ փոխարեն ասացիք. կան մեխանիզմներ, ու այդ մեխանիզմները գործադրելու ճանապարհը կա: Գուցե այդ մեխանիզմներն անկատար են, անմշակ են, փոփոխելու կարիք կա, բայց սևով սպիտակի վրա գրված մեխանիզմներ կան, որոնք նպատակաուղղված են այն բանին, որ ոլորտում մնան լավագույնները: Այդ մասին ասաց նաև վարչապետը, որ մենք չունենք այլ տարբերակ, քան գնալ ճանապարհով, որի արդյունքում կառավարման ոլորտում կմնան լավագույնները: Այդ գործընթացներին չպետք է նայել բացասաբար, պետք է մտածել, որ գնում ենք դեպի լավ բանի:

-Վարչապետն այն համոզման է, որ եթե մշակույթի նախարարության աշխատակիցները մի քանի ամիս շարունակ գործադուլ անեն, մշակութային կյանքում ինչ-որ բան տեղի չի ունենա: 

- Չեմ կարծում, որ դա հնչեցվել  է որպես պատճառաբանություն, դա պատճառաբանություն չէր` միանշանակ, բայց վարչապետի խոսքը չէի ցանկանա մեկնաբանել:

Զրույցը` Վրույր Սևակի