Տղայական մակարդակով հարցերի լուծումը լավ բանի մասին չի խոսում

Հայաստանում ստեղծվել է իրավիճակ, որում իրենց բացթողումն ունեն իրավապահ մարմինները, «երբ ամեն օր սամասուդի` ինքնադատաստանի ականատես ենք լինում». ԱԺ-ում լրագրողների հետ զրույցում անդրադառնալով Գորիսի կրակոցներին եւ, առհասարակ, երկրում ստեղծված մթնոլորտին` նշեց անկախ պատգամավոր Խաչատուր Քոքոբելյանը:

Պատգամավորը ցավում է, որ նման խնդիրներն այս մակարդակում են լուծվում, նման մեթոդներով: Նա էլ է կարծում, որ դա անպատժելիության, բարձիթողիության արդյունք է:

«Հայաստանում անգամ ամենաբարձրաստիճան պաշտոնյաները եւ նրանց զավակներ ապահովագրված չեն, եւ դա իրենք էլ պետք է գիտակցեն: Երբ Հայաստանում տիրում է մի մթնոլորտ, մի վիճակ, որ ցանկացած խնդիր կարելի է լուծել տղայական մակարդակով, դա ոչ մի լավ բանի մասին չի խոսում»,- նշեց Քոքոբելյանը:

Պատգամավորի կարծիքով` իրավապահ մարմինները չպետք է սպասեն, որ դեպքը լինի, հետո ասեն` տեսեք` լուծեցինք, նրանք պետք է բացառեն նմանատիպ դեպքերը: