Փաշինյանը պետք է շարունակի իր քայլերը, բայց երկրորդ կողմն էլ պետք է քայլեր ձեռնարկի. Մերկելը` Արցախյան հիմնահարցի մասին

Մեկնարկել է ՀՀ վարչապետ Նիկոլ Փաշինյանի հանդիպումը Գերմանիայի կանցլեր Անգելա Մերկելի հետ:

Լրագրողներից մեկը նշեց, որ վերջին շրջանում Հայաստանի և Ադրբեջանի ղեկավարները երեք անգամ հանդիպել են, և ի՞նչ է կարծում Մերկելը` ի՞նչ ազդեցություն կունենան այդ հանդիպումները, ինչպես նաև Հայաստանում տեղի ունեցած փոփոխություններն  Արցախյան հիմնահարցի լուծման վրա: Ի պատասխան Մերկելը նշեց, որ լավ է, երբ մարդիկ իրար հետ խոսում են խնդրի մասին, սակայն խոսքերին պետք է որոշ գործողություններ հետևեն:

«Կարծում եմ` խիզախ քայլեր է ձեռնարկել Փաշինյանը, սակայն արդյունքի հասնելու համար պահանջվում է, որ երկրորդ կողմն էլ խիզախ քայլեր ձեռնարկի: Այո, Փաշինյանը պետք է շարունակի իր քայլերը, սակայն, ինչպես արդեն ասացի, երկրորդ կողմն էլ պետք է քայլեր անի»,- ասաց Մերկելը:

Փաշինյանն էլ իր հերթին նշեց, որ «խիզախ քայլեր» բնորոշումը կարևոր է բանակցային գործընթացում: «Հայաստանի խորհրդարանում ամիսներ առաջ հայտարարություն եմ արել, որ Ղարաբաղի հարցի լուծման ցանկացած տարբերակ պետք է ընդունելի լինի Հայաստանի, Արցախի և Ադրբեջանի ժողովուրդների համար: Հույս ունեի, որ այդ հայտարարությանը նմանատիպ հայտարարություն կհետևի ադրբեջանական կողմից, բայց, ցավոք, ադրբեջանական կողմից ոչ մի պաշտոնյա նույնիսկ կիսաձայն չի բարձրաձայնում, որ Ղարաբաղի հարցի որևէ լուծում կարող է ընդունելի լինել Հայաստանի և Արցախի ժողովուրդների համար»,- ասաց Փաշինյանը:

Նա նաև հավելեց, որ այս մեկ հայտարարության պատմությունը հստակ ցույց է տալիս այն իրավիճակը, որը գոյությւոն ունի բանակցային գործընթացում: Ըստ Փաշինայնի` քանի դեռ հստակ հայտարարություններ չեն հնչում ադրբեջանական կողմից, շատ մեծ հույսեր ունենալ, որ կարող ենք առաջ շարժվել այս հարցում, չենք կարող: «Իհարկե, ՀՀ-ն նվիրված է բանակցային գործընթացում բացառապես խաղաղ ճանապարհով հարցը լուծելու տրամաբանությանը: Ես մեր քննարկումների ժամանակ էլ շեշտել եմ, որ կարող եմ բանակցել միայն ՀՀ-ի անունից, բայց ոչ` Արցախի, քանի որ Արցախի ժողովուրդը մեր ընտրություններին չի մասնակցում, նրանք ունեն իրենց նախագահը, վարչապետը: Արցախի ժողովրդի անունից պետք է խոսեն Արցախի ժողովրդի կողմից ընտրված պաշտոնյաները»,- ասել է նա: