Ղազախստանի խորհրդարանը վավերացրել է ԵԱՏՄ-ի մասին պայմանագրում Հայաստանով պայմանավորված փոփոխությունները

Ղազախստանի խորհրդարանի վերին պալատի պատգամավորները լիագումար նիստում դիտարկել և հավանության են արժանացրել Եվրասիական տնտեսական միության մասին պայմանագրում փոփոխություններ մտցնելու մասին արձանագրության վավերացումը. հայտնում է РИА Новости-ն:

Արձանագրությունը ԵԱՏՄ անդամ պետության ղեկավարները ստորագրել են 2018-ի մարտի 15-ին Մոսկվայում:

Արձանագրության նպատակն է փոփոխություններ մտցնել պայմանագրի 10-րդ հոդվածի 2 կետում: Դրանք հնարավորություն կտան, որ Բարձրագույն խորհրդի կազմում ներառվի ոչ միայն անդամ պետության ղեկավարը, այլև անդամ պետության կառավարության ղեկավարը: Փոփոխությունները կապված են այն հանգամանքի հետ, որ ՀՀ-ում սահմանադրական փոփոխություններ են տեղի ունեցել, և երկիրն անցել է կառավարման խորհրդարանական համակարգի: