Արցախի փողոցի թիվ 8 և 10 վթարային շենքերի բնակիչների տարհանումը ձգձգվում է նրանց տարաձայնությունների պատճառով

Երևանի Արցախի փողոցի թիվ 8 և 10 վթարային շենքերի բնակիչների տարհանումը ձգձգվում է բնակիչների միջև եղած տարաձայնությունների պատճառով: Երևանի քաղաքապետի տեղակալ Հայկ Սարգսյանը, պատասխանելով ավագանու ԲՀԿ խմբակցության անդամ Արմեն Ներսիսյանի՝ բնակիչներին բնակարան տրամադրելու մասին հարցին, նշեց, որ քաղաքապետը հանձնարարական է տվել, և իրենք այդ հարցով զբաղվում են:

«Քանի որ առկա է 170 բնակարան 2 շենքերում էլ, պետք է լինի արդար բաշխում: Երկու շենքերը  սեյսմիկ սոսկալի վիճակում են, և որևէ մեկին առավելություն տալ տրամաբանական չէ: Երկու շենքն էլ  զուգահեռ պետք է վերաբնակեցվի և, հետևաբար, բնակարանային ֆոնդի մեծ պահանջ է առաջացել»,-ասաց նա:

Քաղաքապետ Հայկ Մարությանը, նախ և առաջ կարևորելով մարդկային կյանքը, նշեց, որ բնակիչների մի մասին տրամադրվել են բնակարաններ, իսկ մյուս մասին առաջարկվել է բնակվել վարձով՝ քաղաքապետարանի կողմից վարձավճարի հատուցման պայմանով, մինչև կկառուցվի երկրորդ շենքը: «Քանի որ անվտանգության խնդիր կա, որոշվեց չսպասել երկրորդ շենքի կառուցմանն ու տարհանել բնակիչներին: Հուսով եմ, որ բնակիչները կհասկանան իրար և ճիշտ որոշում կկայացնեն»,- հավելեց նա: