Reuters-ի աղբյուրը պատմել է` ինչպես են սպանել սաուդցի լրագրողին

Ստամբուլում Սաուդյան Արաբիայի հյուպատոսության շենքում սպանված սաուդացի ընդդիմադիր լրագրող Ջամալ Խաշուկջիին պատահաբար  խեղդամահ են արել խուճապի ժամանակ: Այդ մասին գրում է Reuters-ը՝ սաուդյան կառավարությունում բարձրաստիճան աղբյուրի հղումով. տեղեկացնում է РИА Новости-ն:

Ըստ աղբյուրի` նրան չեն ծրագրել սպանել: Թագավորությունը Թուրքիա է ուղարկել 15 մարդու, որոնք պետք է Խաշուկջիին համոզեին տուն վերադառնալ: Հանդիպման ժամանակ նրանք սկսել են սպառնալ նրան, խոստացել առևանգել: Լրագրողը դիմադրություն է ցույց տվել, օգնություն կանչել, ինչից գործակալները սկսել են խուճապի մատնվել: Խաշուկջիին փորձել են լռեցնել` բերանը փակելով, սակայն չափն անցել են:

Սխալը թաքցնելու համար մարդասպանները նրա մարմինը փաթաթել են գորգի մեջ, դուրս բերել շենքից հյուպատոսական մեքենայով և փոխանցել տեղացի համախոհի՝ Ստամբուլի բնակչի: