ՌԴ ՔԿ-ն կրկին կուսումնասիրի գործարար Լևոն Հայրապետյանի մահվան հանգամանքները

Ռուսաստանի Դաշնության քննչական կոմիտեն կրկին կուսումնասիրի 2017թ. Մորդովիայի գաղութում հայ գործարար, բարերար Լևոն Հայրապետյանի մահվան հանգամանքները. հայտնում է Коммерсантъ-ը:

«Մահվան նախօրեին Հայրապետյանը զանգահարել էր Հայաստանում գտնվող եղբորն ու ընկերոջը`Արցախի թեմի առաջնորդ Պարգև սրբազանին՝ տեղեկացնելով, որ իրեն թունավորել են»,- Коммерсантъ-ին պատմել է փաստաբան Կարեն Ներսեսյանը:

Ներսեսյանը, վերլուծելով Հայրապետյանի և նրա բարեկամների միջև հարաբերությունների բնույթը,  չի բացառում, որ Հայրապետյանի թունավորմանը կարող են առնչություն ունենալ բարեկամները: «Հայրապետյանի ժառանգության ընդհանուր չափն առնվազն 100 մլն դոլար է, այդ թվում՝ նաև անշարժ և շարժական գույքը: Եթե Լևոնը բանտից դուրս գար, ապա ընտանիքում կոնֆլիկտային հարաբերությունների պատճառով ինչ-որ մեկը կարող էր զրկվել ժառանգության իրավունքից, ինչը, իհարկե, նրանց շահերից չէր բխում»,- իր տեսակետն է հայտնել փաստաբանը: