Նիկոլ Փաշինյանը նախատեսում է հանդիպում ունենալ Գագիկ Ծառուկյանի հետ

Քննչական կոմիտեում լրագրողների հետ զրույցում ՀՀ վարչապետ Նիկոլ Փաշինյանը տեղեկացրեց, որ նախատեսում է հանդիպում ունենալ ԲՀԿ նախագահ Գագիկ Ծառուկյանի հետ: «Կարծում եմ՝ Փարիզում իմ գտնվելու ընթացքում որոշակի իրադարձություններ են տեղի ունեցել, որոնք անպայման հաշվի կառնենք: Այս ընթացքում եղավ ԲՀԿ նախագահ Գագիկ Ծառուկյանի հարցազրույցը, և ըստ էության` նա պաշտպանեց դեկտեմբերին ընտրություններ անցկացնելու գաղափարը»,- ասաց նա:

Վարչապետը հավելեց, որ հնարավոր է նաև հանդիպում ՀՅԴ-ի ներկայացուցիչների հետ: «Հարցազրույցի արդյունքներով` նախատեսում եմ հանդիպել Գագիկ Ծառուկյանի հետ` հանգուցալուծման սցենարներ քննարկելու համար: Դաշնակցության հետ նույնպես կարող է լինել հանդիպում. ես Փարիզում Դաշնակցության սփյուռքի կառույցի հետ նույնպես քննարկում ունեցել եմ»,- նշեց Փաշինյանը:

Yerkir.am-ի հետ զրույցում Գագիկ Ծառուկյանի մամուլի խոսնակ Իվետա Տոնոյանը հաստատեց այդ տեղեկությունը, սակայն նշեց, որ հստակ ժամկետների վերաբերյալ տեղեկատվություն դեռ չունի: