Կառավարությունը նախատեսում է սեփական արհեստական արբանյակն ունենալ տիեզերքում

Հետաքրքիր նպատակադրում է կատարում կառավարությունն իր նոր ծրագրով' հեռահաղորդակցության ոլորտում կիրականացվեն աշխատանքներ սեփական արբանյակի թողարկման և այն Հայաստանին հատկացված գեոստացիոնար ուղեծրում տեղակայելու ուղղությամբ: Թեեւ տարբեր ժամանակներում նշվել է, որ Ռուսաստանում Հայաստանի համար արբանյակ է կառուցվում, բայց այն, որ կառավարությունն իր ծրագրում ամրագրել է այդ արբանյակի ստեղծումն ու գեոստացիոնար ուղեծրում տեղակայումը, դա, թերեւս, նորություն է:

Իսկ, ընդհանուր առմամբ, հեռահաղորդակցության ոլորտում կառավարությունը կրկնում է նախորդ կառավարության «կենացները», այն է' նպաստել ծառայությունների աշխարհագրության ընդլայնմանն ու նորագույն տեխնոլոգիաների կիրառմամբ առաջարկվող ծառայությունների բազմազանությանը և միջազգային չափանիշներին համապատասխան բարձր որակի ապահովմանը։

Կշարունակվեն նաեւ հանրապետության տարածքում ռադիոհաղորդումների և հեռուստահաղորդումների հասանելիության ավելացման և հեռարձակման թվայնացման քաղաքականությունը, հաճախականային սպեկտրի կարգավորման և դասակարգման աշխատանքները՝ հստակեցնելով կառավարական նշանակության հաճախականային շերտերը և հաճախականությունները,  արդյունքում` ազատ տիրույթներն արդյունավետ օգտագործելու նպատակով, ինստիտուցիոնալ հիմքերի ստեղծումից հետո, տրամադրվելու է հեռուստատեսային մասնավոր մուլտիպլեքսորներին և բարձր տեխնոլոգիաներով աշխատող համակարգերին:

Կառավարության ծրագրի համաձայն` կկատարելագործվի ռադիոմոնիթորինգի համակարգը, ինչպես նաև էլեկտրոնային առևտրի կազմակերպման նպատակով կստեղծվի համապատասխան ենթակառուցվածք: