ՀՔԾ-ն իրավունք չունի դատարանի որոշումն ապօրինի համարել. Հայկ Ալումյան

Ցավալի է, որ որևէ պետական մարմին դատարանի որոշումը համարում է ապօրինի: Այս մասին լրագրողների հետ զրույցում ասաց փաստաբան, ՀՀ երկրորդ նախագահ Ռոբերտ Քոչարյանի պաշտպան Հայկ Ալումյանն՝ անդրադառնալով երեկ՝ ՀՔԾ-ի հայտարարությանը, որ ՀՀ վերաքննիչ քրեական դատարանի կողմից Քոչարյանի նկատմամբ կիրառված կալանքի որոշման վերացումն ապօրինի է:

Ալումյանի խոսքով՝  ՀՔԾ-ն, հավանաբար, լավ չի պատկերացնում իր ասած արտահայտության իմաստն ու իր սեփական լիազորությունների շրջանակը: «Եթե որևէ փաստաբան դատարանի որևիցե որոշում անվանում է ապօրինի ու պատրաստվում է վիճարկել այն, դա որոշ առումով հասկանալի է, քանի որ փաստաբանը  հանդես չի պետության անունից, իսկ պետական մարմինը նման իրավունք չունի: ՀՔԾ-ն կարող էր ասել, որ համաձայն չէ դատարանի որոշման հետ, տեսնում են որոշակի թյուր բաներ, սակայն իրավունք չունի դատարանի որոշումն ապօրինի համարել»,-ասաց Ալումյանը: