«Բնակարան երիտասարդ ընտանիքներին» ծրագիրը կընդլայնվի ու կդառնա ավելի մատչելի. Փաշինյան

Այսօր ՀՀ վարչապետ Նիկոլ Փաշինյանը ֆեյսբուքյան ուղիղ միացմամբ անդրադարձավ քաղաքացիների հարցերին: Հարցին, թե ինչ նորություններ կան երիտասարդ ընտանիքներին  հիփոթեքով տրամադրվող բնակարանների ծրագրի վերաբերյալ, և արդյո՞ք միջին աշխատավարձ ստացող զույգը կարող է և՛ բնակարան ձեռք բերել, և՛ պահել գոնե 1 երեխա, Փաշինյանը պատասխանեց, որ վերջին մեկ ամսվա ընթացքում ԿԲ-ի հետ քննարկել են այդ թեման, ևս մեկ մեծ խորհրդակցություն նախատեսված է վաղը:

Փաշինյանը տեղեկացրեց, որ այս թեմայի հետ կապված կան լավ լուրեր, այն է`  կշարունակվի և նոր թափ կստանա «բնակարան երիտասարդ ընտանիքներին»  ծրագիրը, և կմեկնարկի «բնակարան զինծառայողներին» ծրագիրը: Լավ  նորությունն այն է, որ կունենանք հիփոթեքային վարկի աննախադեպ ցածր տոկոս, մեծ է հավանականությունը, որ ծրագրով կունենանք 7-7,5 տոկոսանոց հիփոթեքային վարկեր:

Ըստ Փաշինյանի,  20 միլիոն դրամանոց բնակարանի համար ամիսը անհրաժեշտ կլինի վճարել հարյուր հազար դրամ: Եվ եթե ընտանիքում գոնե երկու անձ միջին աշխատավարձ ստանան, յուրաքանչյուրը` 200 հազար դրամով, ապա հնարավոր կլինի մարել վարկը:

 Ինչ վերաբերում է  կանխավճարներին, ապա վարչապետն ասաց, որ զինվորականների դեպքում նախատեսվում է  տասը տոկոս, իսկ երիտասարդ ընտանիքների դեպքում մեծ հավանականությամբ` 30 տոկոսից կիջնի 20 տոկոս: Նիկոլ Փաշինյանը շեշտեց, որ ծրագիրը կընդլայնվի այնպես, որ հիպոթեքով բնակարանները վերաբերեն ոչ միայն Երևանում կառուցվող բնակարաններին, այլ նաև մարզերին: