Թալանի բոլոր մասնակիցները պետք է պատասխանատվության կանչվեն. Փաշինյան

Մենք գործ ունենք երրորդ հանրապետության պատմության ամենամեծամասշտաբ կոռուպցիոն բացահայտման հետ. այսօր կառավարության արտահերթ նիստում հայտարարեց ՀՀ վարչապետ Նիկոլ Փաշինյանը` խոսելով ԱԺ պատգամավոր, գեներալ Մանվել Գրիգորյանի վերաբերյալ բացահայտման մասին: «ԱԺ պատգամավոր Մանվել Գրիգորյանի առանձնատանը կատարված բացահայտումները, բառի բուն իմաստով, ցնցող են և շոկային»,- նշեց նա:

Նիկոլ Փաշինյանը շնորհակալություն հայտնեց ԱԱԾ տնօրենին` խնդրելով շնորհակալական խոսքեր փոխանցել այն աշխատակիցներին, ովքեր մշակել են այս օպերացիան: «Բոլորս էլ հասկանում ենք, որ այս գործողությունը մեկ օրում չ իկազմակերպվել, դրան նախորդել է ծավալուն աշխատանք»,- նշեց նա:

Վարչապետը հույս հայտնեց, որ այս գործի քննությունը կընթանա պատշաճ մակարդակով: «Ես հույս ունեմ, որ ՀՔԾ-ում քննությունը կընթանա բարձր մակարդակով, և գլխավոր դատախազությունը կապահովի քննության բարձր մակարդակը», -ասաց նա և հավելեց. «Չեմ տեսնում որևէ խոչընդոտ, որ գործի բոլոր մասնակիցները պատասխանատվության կանչվեն` անկախ նրանց կոչումներից, կարգավիճակներից: Այս գործը պետք է մինչև վերջ բացահայտվի»:

Վարչապետը հերթական անգամ ընդգծեց, որ կոռուպցիայի հետ որևէ կոմպրոմիս չի լինելու: «Մենք հայտարարում ենք, որ Հայաստանից կոռուպցիան արմատախիլ ենք անելու»,- ասաց նա: