Ինչու՞ է հայ լեռնադահուկորդը մեկնել ԱՄՆ

Շուրջ չորս ամիս առաջ ՀՀ սպորտի և երիտասարդության հարցերի նախարար Հրաչյա Ռոստոմյանի հանձնարարականով լուծարվեց Հայաստանի լեռնադահուկային սպորտի հավաքական թիմը: Փհենչհանում կայացած ձմեռային օլիմպիական խաղերի ժամանակ լեռնադահուկորդ Աշոտ Կարապետյանի հետ կատարված տհաճ միջադեպից հետո դեռևս հավաքականի նոր թիմ չի ձևավորվել:

Լեռնադահուկային սպորտի երեք առաջատարներն այժմ մարզվում են անհատական գրաֆիկով: Yerkir.am-ի տեղեկություններով` լեռնադահուկորդներից Վազգեն Առաքելյանն արդեն մի քանի ամիս է մեկնել է ԱՄՆ և մարզումները շարունակում է այնտեղ:

Նշենք, որ Վազգեն Առաքելյանը մասնակցել է տարբեր միջազգային մրցաշարերի, եղել է լեռնադահուկային սպորտի Հայաստանի առաջնության մրցանակակիր: Վազգեն Առաքելյաննը 2018թ. օլիմպիական խաղերից առաջ վնասվածք էր ստացել և բաց թողել վարկանիշային վերջին մրցաշարը:

Yerkir.am-ի հետ զրույցում Վազգենը նշեց, որ ԱՄՆ-ում մարզվում է հայ մարզչի` Արսեն Հարությունյանի մոտ: Վերջինս 1998թ. և 2002թ. ձմեռային օլիմպիական խաղերում ներկայացել է Հայաստանի դրոշի ներքո:

«Հայաստանում մենք մարզվելու մեծ խնդիր ունենք. նախ եղանակային պայմանները, մարզիչների որոկավորման պակասը և այլն: Ծաղկաձորում այդքան էլ շատ չենք կարողանում մարզվել, սահուղիները հիմնականում ծանրաբեռնված են արտերկրից ժամանած մարզիկներով և զբոսաշրջիկներով: Ես մեծ դժվարությամբ կարողացա մեկնել ԱՄՆ, որպեսզի այնտեղ մարզվեմ և օգտակար լինեմ երկրիս»,-ասաց նա` նշելով, որ ԱՄՆ-ում մշտական բնակության մտադրություն չունի:

Վազգենի նպատակը հաջորդ ձմեռային օլիմպիական խաղերին մասնակցելն է: «Ես գիտեմ, որ մարզական հաջողությունների համար հարկավոր է քրտնաջան մարզվել, առջևում երեքուկես տարի կա, ամեն ինչ անելու եմ, որ այս ընթացքում բարելավեմ արդյունքներս»,-ասաց նա` նշելով, որ վերադառնալուց հետո կմիանա Հայաստանի լեռնադահուկային սպորտի հավաքականին, եթե իհարկե հավաքականը ցանկանա: