Հակված ենք պետությունից գողացված գումարները պետբյուջե վերադարձնելուն. Արթուր Վանեցյան

ԱԱԾ տնօրեն Արթուր Վանեցյանը չի շտապում հայտնել, թե որ ոլորտներում կամ գերատեսչություններում են բացահայտումներ սպասվում: Խորհրդարանում լրագրողների հետ զրույցում նա հորդորեց սպասել մի քիչ, և կտեսնեն բոլորը:

Հարցին՝  այդ բացահայտումները որքա՞ն գումար կբերեն բյուջե, Վանեցյանը պատասխանեց. «Դրա մասնագետը չեմ։ Կարող եմ արձանագրել միայն խախտումները, իսկ ֆինանսական տվյալները կարձանագրի ՊԵԿ-ը»։ Նրա խոսքով՝ իրենց նպատակը գողացած գումարները պետբյուջե վերադարձնել է։

Անդրադառնալով «Ալեքս Հոլդինգ» ՍՊԸ-ի աշխատակիցների և նրանց ընտանիքների անդամների ու ծանոթների անվամբ գրանցված 461 ԱՁ-ներին, որոնք գործունեություն են ծավալել «Երևան Սիթի» սուպերմարկետների ցանցում, ԱԱԾ տնօրենն ասաց, որ իրենք հակված չեն մարդկանց ձերբակալել, նստեցնել։ «Մենք հակված չենք սկսել ինչ-որ ռեպրեսիվ գործողություններլ և մարդկանց ձերբակալել, ավելի հակված ենք պետությունից այս կամ այն ճանապարհով շրջանցված գողացված գումարները վերադարձնել պետբյուջե: Բոլորն ասում են, որ ինչ-որ գործի հետևում կանգնած է մեկը, բայց հավատացեք` իրավական առումով բավականին բարդ է և գրեթե անհնար, իսկ այն մարդիկ, ում անունով գրանցված են այդ ձեռնարկությունները, նրանց կանչել քրեական պատասխանատվության, կարծում եմ, ոչ արդարացի է, և քրեական հոդվածը, որով հարուցվում են քրգործերը, նախատեսում են պետբյուջեի վնասը վերականգնելու դեպքում քրեական գործը կարճել»,- նշեց նա։

ԱԱԾ տնօրենն ասաց, որ կլինի քննություն, որին կհրավիրվեն նաև այն պաշտոնատար անձինք, ովքեր տեղյակ են եղել այդ գործողություններից: «Եթե չեն կարողանա տալ հստակ պատասխաններ իրենց գործողությունների մասին, նրանք կներգրավվեն քրգործում` որպես մեղադրյալներ»,- ասաց Վանեցյանը։

Հարցին՝ ՊԵԿ նախկին նախագահը պատասխանատվության կենթարկվի՞, նա արձագանքեց. «Նախկին ղեկավարներ ասելը չի նշանակում, որ Վարդան Հարությունյանն է։ Հրավիրվելու են  ՊԵԿ երկու նախկին նախագահները ևս: Քննություն է կատարվում, ես չեմ կարող ասել ձեզ բոլոր մանրամասները»: