Տարոն Մարգարյանը բավականին հաջող քաղաքապետ է և մեծ ժողովրդականություն է վայելում. Շարմազանով

Տեղական ինքնակառավարման մարմինը, որը ընտրվել է ժողովրդի քվեով, պետք է շարունակի իրականացնել օրենքով իրեն վերապահված լիազորությունները. խորհրդարանում լրագրողներին ասաց ՀՀԿ խոսնակ, ԱԺ փոխնախագահ Էդուարդ Շարմազանովը:

«Առնվազն ինձ համար անակնկալ է, որ վարչապետն ասում է, որ ինքը դատական համակարգին չի միջամտելու, բայց միջամտում է օրենսդիրի կամ ՏԻՄ աշխատանքներին: Ինչքան որ իրավունք չունի դատական համակարգին միջամտելու, այնքան էլ` ՏԻՄ-երին»,- ասաց նա:

Շարմազանովը վստահեցրեց, որ Հանրապետական կուսակցությունում Տարոն Մարգարյանի հրաժարականի մասին հարց չի քննարկվում: «Տարոն Մարգարյանը բավականին հաջող քաղաքապետ է և մեծ ժողովրդականություն է վայելում»,- նշեց նա:

Դիտարկմանը, թե վարչապետը հայտարարել է, որ Տարոն Մարգարյանը ընտրակաշառքներով է ընտրվել Երևանի քաղաքապետ, Շարմազանովն արձագանքեց. «Ես էլ կարող եմ շատ բան ասել շատերի մասին: Եթե կան փաստեր, թող փաստեր ներկայացնեն»:

Նա նշեց, որ ո'չ վարչապետը, ո'չ նախագահը, ո'չ որևէ այլ ոք չեն կարող ստիպել ընտրված մարդուն անել հակաօրինական քայլեր: