Արտառոց դեպքերում բանտ կգնան, ինչը դաս կլինի մյուսների համար. ԿԳ նախարարը՝ կոռուպցիոն դեպքերի մասին

Հրատապ լուծման՝ օրերի, շաբաթների խնդիր է դրամահավաքների կանխումը, ունենք լուրջ հաջողություններ՝ մի շարք դպրոցներում հետ են վերադարձվում հավաքված գումարները. լրագրողների հետ զրույցում ասաց ՀՀ ԿԳ նախարար Արայիկ Հարությունյանը:

Նրա խոսքով՝  դրամահավաքության, կոռուպցիայի հետ կապված փաստերի հարցով դիմել են ոստիկանություն և ԱԱԾ: «Մեկ գործով ԱԱԾ-ն է զբաղվում,  3 գործ ուղարկվել է ոստիկանություն, բայց ընթացքում նաև մեր տեսչական մարմինն ու հանրակրթական վարչությունն աշխատում են այդ դեպքերի կանխման ուղղությամբ: Մենք նպատակ չունենք բոլորին բանտեր ուղարկել, բայց արտառոց դեպքերում նրանք բանտեր կգնան, և դա դաս կլինի մյուսների համար»,- ասաց Հարությունյանը:

Նա կոչ արեց տնօրեններին և ուսուցիչներին, ովքեր կոռուպցիոն միջոցներով են աշխատում, դադարեցնել այդ գործողությունները և լքել կրթական համակարգը, որովհետև նման կերպ հնարավոր չէ այլևս աշխատել: