Բանակում, կոռուպցիոն դեպքերի հետ կապված, լայնամասշտաբ քայլեր են ձեռնարկվում

Այսօր լրագրողները ՊՆ մամուլի խոսնակ Արծրուն Հովհաննիսյանից հետաքրքրվեցին ԼՂՀ ԱԺ ընդդիմադիր պատգամավոր Վահան Բադասյանի այն հայտարարության վերաբերյալ, թե ՀՀ ԱԺ պատգամավոր, գեներալ Մանվել Գրիգորյանը Հադրութում հայհոյել, վիրավորել է զինվորներին: Նախ Արծրուն Հովհաննիսյանն ասաց, որ իրավասու չէ մեկնաբանել դա:

Լրագրողների ճշտող հարցին` եղե՞լ է նման դեպք, նա պատասխանեց. «Նախ` Արցախի տարածք, երկրորդ՝ ՊԲ, ես ի՞նչ իրավասություն ունեմ: Կապ չունի, որ ԵԿՄ է, ես պաշտպանական գերատեսչության պատասխանատու եմ, ոչ թե ԵԿՄ-ի»:

Հարցին, թե մտահոգիչ չէ՞ այդ երեւույթը, Արծրուն Հովհաննիսյանը կրկին խուսափեց պատասխանել` ասելով. «Չեմ կարող պատասխանել, կներեք»:

Իսկ թե ի՞նչ պատասխանատվության ենթարկվեցինկոռուպցիայի պատճառով աշխատանքից ազատված պաշտոնյաները, Արծրուն Հովհաննիսյանը նշեց. «Բանակում եղած որոշակի կոռուպցիոն դեպքերի հետ կապված` լայնամասշտաբ քայլեր են ձեռնարկվում՝ սկսած ռազմավարական պլանավորման փաստաթղթերում արձանագրված նորմերից մինչեւ իսկ իրավապահ մարմինների կողմից ստուգումներ, ձերբակալություններ, պատիժներ, որոնք տասնյակներով են եղել այս տարիների ընթացքում»:

Հարցին, թե ի՞նչ իրավիճակ է այս պահին Նախիջևանում, և արդյո՞ք վտանգված է ՀՀ սահմանը, ՊՆ խոսնակը պատասխանեց. «Ես չեմ կարող ասել, որ ՀՀ սահմանները թե՛ Տավուշից, թե՛ Նախիջևանից նույնքան աստիճանի վտանգված են, ինչպիսին եղել է ԼՂՀ հատվածում, բայց, իհարկե, ցանկացած կրակոց է մտահոգիչ՝ լինի Տավուշում, թե ԼՂՀ-ում»: