Մեր անվտանգության ու լինելիության երաշխավորը մարտունակ բանակն է. Դավիթ Իշխանյան

Հայ Հեղափոխական Դաշնակցության Արցախի Կենտրոնական կոմիտեի ներկայացուցիչ Դավիթ Իշխանյանը ֆեյսբուքյան իր էջում անդրադարձել է Ապրիլյան պատերազմին: Իշխանյանը գրել է.

«Ապրիլյան պատերազմը, որ հրահրվեց Ադրբեջանի կողմից և իրականացվեց նրան բնորոշ ձեռագրով, նոր ողբերգություն էր բոլորիս համար, բայցև` նոր դաս ու մեր անելիքների մասին խորհելու նոր առիթ:

Ապրիլյան պատերազմը նորից միավորեց բոլորիս՝ ողջ հայության հայացքը սևեռելով դեպի Արցախ, հիշեցնելով, որ Արցախով է անցնում հայության կենսատու երակը, Արցախի սահմանին է կերտվում մեր վաղվա օրը:

Արցախյան պատերազմի հերոսների շարքը համալրվեց նոր հերոսներով` բազմապատկելով մեր պատասխանատվության չափը և մեր անելիքների հանդեպ ողջամտությունը: Ապրիլյան պատերազմը նորից ցույց տվեց, որ մեր անվտանգության ու լինելիության երաշխավորը մարտունակ բանակն է, որի կատարելագործումը պետք է լինի գերնպատակ:

Արցախը հայկական աշխարհի կենտրոնն է, որը պետք է զերծ պահել խարդավանքներից ու ցնցումներից»: