Արմավիրում 22-ամյա երիտասարդին սպանելու կասկածանքով ձերբակալվածը կալանավորվեց

Արմավիրի մարզի ընդհանուր իրավասության դատարանը երեկ բավարարել է քննիչի միջնորդությունն ու կալանավորման որոշում կայացրել Արմավիր գյուղում 22-ամյա երիտասարդի սպանության կասկածանքով ձերբակալված 19-ամյա Վ.Մարտիրոսյանի նկատմամբ: Հայտնաբերվել է նաև հանցագործության գործիք դանակը:

Ավելի վաղ հայտնել ենք, որ 2018թ. մարտի 21-ին՝ ժամը 21:55-ին, «Արմավիր» բժշկական կենտրոնից հաղորդում է ստացվել առ այն, որ «կրծքավանդակի կտրած-ծակած թափանցող վերք» ախտորոշմամբ բուժօգնության է տեղափոխվել 1996թ. ծնված Ն.Պողոսյանը։

Ավելի ուշ՝ մարտի 22-ին՝ ժամը 00-ի սահմաններում, երիտասարդն առանց գիտակցության գալու մահացել է։ Փաստական տվյալներ են ձեռք բերվել , որ Ն.Պողոսյանը կյանքի հետ անհամատեղելի մարմնական վնասվածքներն ստացել է Արմավիր գյուղում կենցաղային հարցերի շուրջ ծագած վիճաբանության ժամանակ:

Նախնական տվյալներով՝ Ն.Պողոսյանին կրծքավանդակի և որովայնի շրջանում, դանակի գործադրմամբ, 7 հարված է հասցվել: Դեպքի առթիվ՝ ՀՀ ՔԿ Արմավիրի մարզի քննչական վարչությունում հարուցվել է քրեական գործ՝ ՀՀ քրեական օրենսգրքի 104-րդ հոդվածի 1-ին մասով: