Հանրային վտանգավորություն չունեցող որոշ տնտեսական հանցագործությունները կապաքրեականացվեն

Այսօր կառավարության նիստում վարչապետ Կարեն Կարապետյանը հանձնարարական տվեց տնտեսական գործունեության ոլորտում որոշ հանցագործությունների ապաքրեականացման վերաբերյալ:

Վարչապետի խոսքով` 2017թ. փետրվարին կառավարության կողմից ներկայացված օրենսդրական նախաձեռնության արդյունքում ապաքրեականացվեց 20 միլիոն դրամի չափով հարկը, տուրքը, պարտադիր այլ վճարները չկատարելու համար նախատեսված նորմը` այն դարձնելով մինչև 4 միլիոն դրամ, հստակեցվեցին այդ արարքների համար քրեական պատասխանատվության հիմքերը:

Միաժամանակ, իրականացված ուսումնասիրությունների, ինչպես նաև գործարարների հետ քննարկումների արդյունքում պարզ դարձավ, որ առաջացել է քրեական օրենսգրքով նախատեսված որոշ տնտեսական հանցագործությունների ապաքրեականացման հարցերին ընդհանուր անդրադարձ կատարելու անհրաժեշտություն: Միջազգային լավագույն փորձում առկա քրեաիրավական զարգացումները ևս ընթանում են այդ ուղղությամբ` հիմք ընդունելով այն, որ նման հանցակազմերի մի մասը չունի հանրային վտանգավորության բարձր աստիճան:

Ելնելով վերոնշյալից` տնտեսական զարգացման և ներդրումների, արդարադատության նախարարներին, ինչպես նաև ՊԵԿ նախագահին հանձնարարվեց երկամսյա ժամկետում համատեղ մշակել և կառավարության աշխատակազմին ներկայացնել քրեական օրենսգրքով նախատեսված տնտեսական գործունեության ոլորտում առկա այն հանցակազմերի ապաքրեականացման վերաբերյալ իրավական ակտերի նախագծեր, որոնք ունեն հանրային վտանգավորության ցածր աստիճան, և առկա են դրանց վարչական վարույթի` քաղաքացիական դատավարության շրջանակներում լուծման արդյունավետ հնարավորությունները: