Մանկապարտեզներում անվտանգության վիճակը մտահոգիչ է. ՄԻՊ

Խորհրդարանում լրագրողների հետ զրույցում ՄԻՊ Արման Թաթոյանն անդրադարձավ մանկապարտեզների և դպրոցների անվտանգության խնդրին: Նա նշեց, որ Արմավիրի մանկապարտեզներից մեկում երեքամյա երեխայի պատանդառության դեպքը վերհանեց այդ խնդիրները. վիճակը մտահոգիչ է, որովետև այսօր շատ հեշտ կարելի է մանկապարտեզ մտնել և հասնել անգամ մինչև երեխաների խումբ: Հետևաբար, ՄԻՊ-ի խոսքով, պետք է ապահովել նմանօրինակ հաստատությունների անվտանգությունը:

«Եղանակներից մեկը կարող է լինել տեխնիկական միջոցներով անվտանգության ապահովումը՝ փակ, կոդավորված դռներ, ինչպես ժամանակակից աշխարհում է արվում: Լուծումը պետք է շատ նուրբ լինի, քանի որ երեխաների հետ գործ ունենք, այն էլ` մանկապարտեզի»,- հավելեց Թաթոյանը:  

Օմբուդսմենը նշեց, որ նախատեսում է ավելի մեծացնել այդ ուղղությամբ իրենց աշխատանքը, արդեն ունեն նոր գործառույթ, երբ խնդիրների դեպքում անարգել կարող են այցելել կրթական հաստատություններ: Թաթոյանն ասաց, որ կրթության և գիտության նախարարության, Երևանի քաղաքապետարանի և ՏԻՄ-երի հետ պետք է աշխատանք տանեն՝ լուծումներ գտնելու համար:  «Պետք է փորձենք հասկանալ կարիքները, ինչ կարգի միջոցներ պետք է ձեռնարկվեն՝ անվտանգությունն ապահովելու համար»,- ասաց նա:

Դիտարկմանը` իրավապահներն անգործություն են դրսևորում, երբ ընտանեկան վեճեր են լինում, օմբուդսմենն արձագանքեց,  որ աշխատում են այդ ուղղությամբ, փորձում են հասկանալ, թե նախկինում կանխարգելիչ բավարար միջոցներ ձեռնարկվե՞լ են:  «Այս պահին, քանի որ քննություն է ընթանում, կանխակալ գնահատական չեմ կարող տալ: Այդ հարցին քննությունը պետք է պատասխանի»,- եզրափակեց նա: