Մյուս ձմեռվանից թալիշցիները ապրելու են իրենց պապական գյուղում. Արայիկ Հարությունյան

Արցախի նորանշանակ պետնախարար Արայիկ Հարությունյանը լրագրողների հետ հանդիպման ժամանակ անդրադարձավ Թալիշի վերաբնակեցման խնդիրներին: Ըստ նրա` Թալիշում լայնածավալ շինարարական աշխատանքներ են ընթանում: «Աշխատանքներ են տարվում բնակավայրերի կառուցման, վերակառուցման, դպրոցի, մանկապարտեզի, համայնքային կենտրոնի, հանդիսությունների սրահի վերակառուցման ուղղությամբ ևս»,- ասաց պետնախարարը:

Նրա խոսքով` բնակիչների տեղափոխությունը ձգձգվում է, որովհետև այնտեղ շինարարական աշխատանքներ են ընթանում: «Հաստատ հաջորդ ձմեռ թալիշցիներն ապրելու են իրենց պապական գյուղում, բայց ոչ պապական օջախներում, որովհետև մենք համեմատաբար անվտանգ տեղերում ենք փորձում կառուցել նրանց նոր տները»,- տեղեկացրեց Հարությունյանը: