Միայն Ադրբեջանում կարող են ասել, թե ինչ առաջարկներ են գրգռել նրա հետաքրքրությունը. Էդվարդ Նալբանդյան

Այսօր ՀՀ ԱԳ նախարար Էդվարդ Նալբանդյանն ու Միացյալ Թագավորության Եվրոպայի և Ամերիկայի հարցերով պետնախարար Ալեն Դանքնը համատեղ ասուլիսով են հանդես եկել:Լրագրողները հարցրել են օրեր առաջ Նյու-Յորքում կայացած Նալբանդյան-Մամեդյարով հանդիպման մասին: Այդ հանդիպումից հետո ադրբեջանական կողմը հայտարարեց, որ աջակցում է համանախագահների ինչ-որ հետաքրքիր առաջարկություններին: Ինչի՞ մասին է խոսքը:

Էդվարդ Նալբանդյանը պատասխանեց. « Արտգործնախարարությունն արդեն հայտարարել էր, որ Նյու Յորքում նախարարները՝ եռանախագահների հետ միասին, խոսել են նախագահների մակարդակով մոտ ապագայում հանդիպման կազմակերպման մասին, ինչպես նաև եռանախագահների՝ տարածաշրջան այցելության վերաբերյալ: Համանախագահներին մենք սպասում ենք Հայաստանում հոկտեմբերի առաջին կեսին. իրենք գալու են նախապատրաստելու հենց նախագահների հանդիպումը:

Այլ հարցերի շուրջ, հատկապես, ինչ-որ առաջարկների, չի խոսվել: Միգուցե միայն Ադրբեջանում կարող են ասել, թե ինչպիսի առաջարկներ են գրգռել Ադրբեջանի հետաքրքրությունը»: