Շիրակի մարզպետը՝ «Փյունիկ» կենտրոնում

 Օգոստոսի 2-ին Շիրակի մարզպետն հյուրընկալվեց «Փյունիկ» կենտրոնում: Արթուր Խաչատրյանը շրջեց, ծանոթացավ կատարված աշխատանքներին ու ծրագրերին:

Տարիներ շարունակ կենտրոնը ամռանը կազմակերպում է ներառական բակային ճամբար: Այս տարի բակային ճամբար կազմակերպվել է 6-14 տարեկան շուրջ 120 երեխաների համար:

Նպատակն է ավելի հետաքրքիր դարձնել փոքրիկների ամառային արձակուրդը: Օրվա մեծ մասը մանուկներն անցկացնում են ճամբարում, մարմնամարզության, բակային ու ամենատարբեր խաղերի միջոցով ապահովվում է ճամբար հաճախող երեխաների ժամանցը, կազմակերպվում են միջոցառումներ ու ներկայացումներ են բեմադրվում:

Ներառական ճամբարի նորաստեղծ տիկնիկային թատրոնը փոքրիկ ներկայացում էր կազմակերպել նաև մարզպետի այցելության կապակցությամբ:
Արթուր Խաչատրյանը ողջունեց կենտրոնի անդամներին ու երեխաներին, կարևորեց այսօրինակ ձեռնարկների իրականացումը.

«Ես ուրախ եմ, որ դուք այսքան կարևոր գործով եք զբաղվում և մեր փոքրիկների առօրյան հետաքրքիր ու բովանդակալից եք դարձնում, վստահեցնում եմ` մենք ձեր կողքին կանգնած ենք և հնարավորությունների սահմաններում կաջակցենք ձեր ձեռնարկների իրականացմանը»: