Արցախի Անկախության օրը կտոնեն «Սասունցի Դավիթ» օպերայի պրեմիերայով

Սեպտեմբերի 1-ին Շուշիի Ռեալական ուսումնարանի բացօթյա տարածքում տեղի կունենա Հարո Ստեփանյանի «Սասունցի Դավիթ» հերոսական օպերայի համաշխարհային պրեմիերան: Ներկայացումը նվիրվում է Արցախի անկախության օրվան, Շուշիի ազտագրման 25-ամյակին և Հարո Ստեփանյանի ծննդյան 120-ամյակին:

Նախագծի հեղինակն ու  գեղարվեստական ղեկավարը Սարինե Ավթանդիլյանն է, դիրիժոր` Սուրեն Շահիջանյան /Ֆրանսիա/,  ռեժիսոր` Արմեն Փիրի Մասիհի, խորեոգրաֆ՝ Արսեն Մեհրաբյան /Շվեդիա/,  խմբավար՝ Սոնա Հովհաննիսյան, դաշնակահար-կոնցերտմայստերներ՝ Զարուհի Թափչյան, Լյուդմիլա Խորոզյան, անիմացիայի ռեժիսորներ՝ Սերժ Գաբյան, Արմեն Փիրի Մասիհի, ոճաբան-գրիմարար՝ Սվետլանա Խոմուտովա:

Օպերային իրենց մասնակցությունը կունենան Ալ. Սպենդիարյանի օպերայի և բալետի ազգային ակադեմիական թատրոնի նվագախումբ և բալետային խումբը և  Հայաստանի պետական «Հովեր» կամերային երգչախումբը: Որպես մեներգիչներ հանդես կգան Մկրտիչ Բաբաջանյան ը /Գերմանիա/, Հայկ Տիգրանյանը, Հովհաննես Անդրեասյանը, Հովհաննես Ներսեսյանը, Պերճ   Քարազյանը, Սոֆյա Թումանյանը, Սիրանուշ Գասպարյանը, Արծվիկ Դեմուրճյանը, Նարինե Անանիկյանը, Քրիստինե Սահակյանը, Թամարա Դադոյանը, Սարգիս Աղամալյանը և այլոք:

Առաջատար մենապարուհին Սյուզաննա Փիրումյանն է: «Սասունցի Դավիթ» օպերան Հարո Ստեփանյանը գրել է 1936-ին: Լիբրետոն գրել է Դերենիկ Դեմիրճյանը` ըստ «Սասունցի Դավիթ» հայ ժողովրդական էպոսի:

«Սասունցի Դավիթ» հերոսական օպերան` իր ինքնատիպ վիպապատմողական երաժշտական լեզվով և ազգային ոգով, հայկական օպերային արվեստի զարգացման նշանակալից փուլն է նշանավորում:

Հիշեցնենք, որ ներկայացումը պատրաստվում էր կյանքի կոչվել դեռ նախորդ տարի, սակայն ինչ-ինչ խնդիրների պատճառով դրա պրեմիերան հետաձգվեց մեկ տարով: