Առաջարկվել է Ռուսաստանում տուգանք սահմանել սոցցանցային որոշ գրառումների համար

ՌԴ պետդումայում իշխող «Եդինայա Ռոսիա» խմբակցության պատգամավորներ Անդրեյ Ալիշևսկին և Սերգեյ Բոյարսկին օրենքի նախագիծ են մտցրել, որով առաջարկվում է պարտադրել սոցցանցերին հեռացնել մարդկանց զրպարտող գրառումները: Իսկ պահանջը չկատարելու դեպքում գրառում կատարողը տուգանվում է 30-50 միլիոն ռուբլու չափով` իրավաբանական անձանց դեպքում, ֆիզիկական անձանց դեպքում` 3-5 միլիոն ռուբլու չափով:

«Մենք տեսնում ենք, որ ոչ մեծ տուգանքները այսօր չեն կանգնեցնում մարդկանց, ովքեր զրպարտանք ու վարկաբեկում են տարածում, բորբոքում սոցցանցը իրենց ազգայնական ու կրոնական հաշվեհարդարի կոչերով»,- ասել է օրենքի նախագծի հեղինակներից մեկը:

Օրենքի նախագիծը ունի շանսեր ընդունվելու Պետդումայի կողմից:Ըստ նախագծի, 2 միլիոնից ավել օգտատեր ունեցող սոցցանցերը պարտավոր կլինեն որևէ օգտատիրոջ պահանջով հեռացնել այն գրառումները, որոնք պարունակում են ազգային, ռասսայական կամ կրոնական թշնամանք սերմանող բովանդակություն: Սոցցանցը նաև պետք է հեռացնի ոչ հավաստի կամ զրպարտող տեղեկատվությունը:

Այսօր Ռուսաստանում երկու միլիոնից ավել օգտատեր ունեն Ֆեյսբուք, Վկիոնտակտե, Օդնոկլասսնիկի սոցցանցերը: Օրենքի նախագծի հեղինակները կարծում են, որ այսօր սոցցանցերը ամենակարևոր հարցերում սկսել են առաջնային նշանակություն ձեռք բերել, ուստի նրանց դերը հսկայական է:

Թե ինչպես է սոցցանցը ստուգելու որևէ ինֆորմացիայի հավաստի լինելը, արտացոլված չէ առաջարկվող օրենքի նախագծում: Օրենքը նախատեսվում է գործողության մեջ դնել 2018թ հունվարի 1-ից: