Չելյաբինսկում ջրահեղձ եղած եղբայրները ավարտական խնջույք են նշել

Արդեն տեղեկացրել ենք, որ Չելյաբինսկի Մաքսիմկա լճում շրջվել է մոտորանավակ, և ջրահեղձ է եղել 7 մարդ:

Московский комсомолец-ը նոր մանրամասներ է հայտնում դեպքի մասին: Այսպես` հայտնի է, որ նավակը պատկանել է հայ գործարարի: Հայ եղբայրները երեխաների հետ նավակով շրջելիս են եղել Մաքսիմկա լճում, երբ նավակը հանկարծակի շրջվել է։ Ափին կանգնած մյուս եղբայրներն անմիջապես նետվել են ջուրը` նրանց փրկելու, սակայն նույնպես խեղդվել են: Սակայն նրանցից մեկը մահվանից առաջ հասցրել է փրկել իր տղային:

Տեղի իշխանությունները կարծում են, որ դեպքը պատահել է մեծերի սխալի պատճառով. նրանք շատ մարդ են նստեցրել նավակը, այն գերբեռնված է եղել, ինչպես նաև մարդկանց չեն ապահովել  փրկարարական բաճկոններով: Դեպքի հետևանքով զոհվել է 3 տղամարդ և 4 երեխա:

Интерфакс-ը հայտնում է, որ Մաքսիմա լիճը նախատեսված չէր լողալու կամ նավակով շրջելու համար:

Հաղորդվում է նաև, որ եղբայրները նշել են նրանցից մեկի ավարտական խնջույքը: