«Ամեն»` ներկայացում, որը պատմում է ինչպես մեր անցած ուղու, այնպես էլ ժամանակակից հայի մասին

Վաղը Կարեն Դեմիրճյանի անվան մարզահամերգային համալիրի  բեմում «AMEN Project» ընկերությունը կներկայացնի «Ամեն» երաժշտական դրամատիկ շոու–ներկայացման պրեմիերան։ 

Ներկայացման պրոդյուսեր Հասմիկ Չախմախչյանը Yerkir.am-ի հետ զրույցում նշեց, որ նախագիծը կոչվում է «Ամեն», քանի որ «Ամեն» նշանակում է` թող այդպես էլ լինի, և նրանք իրենց հեքիաթում աշխարհին ցույց կտան Հայաստանը` որպես մշակութային արժեքներ կրող և պահպանող երկիր։

«Մենք կոմպոզիտոր և երաժշտական պրոդյուսեր Արաքսյա Մուշեղյանի հետ 3 տարուց ավելի զբաղվել ենք նախագծի գաղափարի իրականացման վրա: Ուզում էինք ստեղծել մի նախագիծ, որը թույլ կտար մարդկանց ավելի լավ ճանաչել Հայաստանը, առնչվել նրա հին և հարուստ պատմությանը, մշակույթին, տեսնել մեր անցած ուղին, հասկանալ՝ որտեղից ենք գալիս: Փորձեցինք պատմել մեր պատմությունն այնպես, ինչպես տեսնում և զգում ենք ինքներս: Ուզում էինք մեր` հայ ժողովրդի մասին պատմել երաժշտության միջոցով` պրոֆեսիոնալ երաժշտության միջոցով»,- ասաց Չախմախչյանը:

Նախագիծը, ըստ նրա, պատմում է այն մասին, թե ով ենք մենք` հայերս, ինչ ենք ստեղծել, ինչ ձևով են ապրում: Ներկայացման մեջ կարող ենք տեսնել թե՛ մեր անցած ուղին, թե՛ ժամանակակից հային: «Շոուն ունի միասնական սյուժե, որը ներկայացնում է հայ ժողովրդի պատմության հիմնական դրվագները։ Մենք պատմում ենք մեր ծագման և հավատքի, քաղաքակրթության պատմության մեջ մեր կողմնորոշիչների մասին։ Ուզում ենք ասել` չնայած մեր կորուստներին, մենք շարունակել ենք ապրել ու արարել»,- ասաց Չախմախչյանը:

Նախագծի պրոդյուսերը տեղեկացրեց նաև, որ արդեն կան պայմանավորվածություններ` տարբեր երկրներում այն ներկայացնելու համար:

Ի դեպ, ներկայացմանը մասնակցում են սիմֆոնիկ նվագախումբ, դասական երգչախումբ, փոփ և ֆոլկ համույթներ, պարային համույթ, ինչպես նաև ճանաչված հայկական և արևմտյան օպերային կատարողներ։ Բեմում ծավալվող պատմությունը ուղեկցվում է էկրանին ցուցադրվող պատկերներով և անիմացիայով։

 «Ամեն»-ի շուրջ է համախմբվել  հսկայական  պրոֆեսիոնալ թիմ. լիբրետոն հեղինակել է Էդուարդ Այանյանը (Հայաստան),  երգերի  տեքստերը գրել են Ջիոմմարիա  Մոնթին (Իտալիա)  և Սուրեն Ենոքյան–Իսրայելյանը (Հայաստան):  Բեմադրող-խորեոգրաֆն է  Գրիգոր Խաչատրյանը (Հայաստան):  Որպես խորեոգրաֆներ հանդես են գալիս Արման Ջուլհակյանն ու Արա Ասատուրյանը (Հայաստան): Զգեստների դիզայնն իրականացրել է Միքայել Շարաֆյանը (ԱՄՆ):  Պրոդյուսերն է Ելենա Շուբինան (Ռուսաստան), գլխավոր պրոդյուսերը`  Հասմիկ  Չախմախչյանը (Ռուսաստան):

Ներկայացմանը մասնակցում են սիմֆոնիկ նվագախումբ (Հայաստանի  ազգային  ֆիլհարմոնիկ   նվագախումբ), դասական երգչախումբ («Հովեր» պետական  կամերային երգչախումբ ),  փոփ և ֆոլկ համույթներ,  պարային համույթ, ինչպես նաև  ճանաչված օպերային կատարողներ։