Օֆշորային երկրների ցանկը հրապարակվեց` հարկերից խուսափելու մեխանիզմները կանխելու նպատակով

Այսօր կառավարության նիստում հաստատված չզեկուցվող հարցերի թվում էր օֆշորային գոտիների (երկրների) ցանկը սահմանելու մասին հարցը: Կառավարության նիստից հետո լրագրողները ֆինանսների նախարար Վարդան Արամյանից խնդրեցին հստակեցնել` ինչի մասին է խոսքը:

Նախարարը նշեց. «Սովորաբար մենք սկեպտիկորեն ենք վերաբերվում «օֆշոր» հասկացությանը, դա իրականում այդպես չէ, որովհետև օֆշորային գոտիները հրապարակվում են նաև Արժույթի միջազգային հիմնադրամի կողմից: Մի քանի չափանիշների հիման վրա դիտարկվում են այն երկրները, որտեղ շահութահարկի նորմը կամ դրույքը բավական ցածր է համաշխարհային միջին ցուցանիշներից:Հայաստանում օրինակ շահութահարկը 20 տոկոս է, իսկ երկրներ կան, որտեղ այն 0 տոկոս է: Եվ այդ երկրների ցանկը հրապարակվում է զսպող մեխանիզմներ կիրառման համար, որ հարկերից խուսափելու մեխանիզմներ չաշխատեն»:

Վարդան Արամյանի խոսքով` ամբողջ աշխարհում ընդունված նորմ է` հրապարակել օֆշորային գոտիների ցանկը: Ի դեպ, այդ երկրների ցանկը մեծ է և ընդգրկում է այնպիսի երկրներ, ինչպիսիք են Սինգապուրը, Իռլանդիան: