Անհետացած «մարդասպանի» համար ուզում են գերեզմանաքար դնել

Կենտրոն և Նորք-Մարաշ վարչական շրջանների ընդհանուր իրավասության դատարանում այսօր ավարտվեց քրեական հեղինակություն Կայարանցի Թևոսիկի եղբոր՝ Արթուր Սաֆարյանի սպանության գործով դատաքննությունը: Այսպիսով` դատարանն անցավ դատական վիճաբանությունների փուլին: Հաջորդ դատական նիստում մեղադրական ճառով հանդես կգա դատախազ Հայկ Հակոբյանը:

Այսօր դատարան գրություն էր ստացվել գործով տուժող Մովսես Ներսիսյանի իրավահաջորդ Կարեն Ներսիսյանից: Նա հայտնել էր, որ չի կարող ներկայանալ դատարան, և որ դատարանը կարող է ընդունել իր նախաքննական ցուցմունքը: Բացի այդ` նա խնդրել էր դատարանին Մովսես Ներսիսյանի սպանության համար Իսրայել Սարգսյանին մեղավոր ճանաչելու դեպքում բավարարել իր հայցը: «Դատապարտելու դեպքում խնդրում եմ բավարարել իմ հայցը, որպեսզի ես կարողանամ գոնե հորս հիշատակի համար գերեզմանատան համար տարածք վերցնել և նրա համար հուշաքար տեղադրել»,- նշել էր Կարեն Ներսիսյանը:

Հիշեցնենք, որ, համաձայն գործի նյութերի, Սաֆարյանի սպանությունը պատվիրել և կազմակերպել է Իսրայել Սարգսյանը, ով էլ հանցանքը թաքցնելու նպատակով սպանել է սպանությունը կատարած Մոսոյին ու դիակը թաքցրել կոյուղու դիտահորում: Մոսոյի դիակն այդպես էլ մինչ օրս չի հայտնաբերվել, իսկ ամբաստանյալ Իսրայել Սարգսյանը պնդում է, որ Իսոն ողջ է, և ինքն է այնպես արել, որ նա հեռանա երկրից: Նշենք, որ այսօրվա նիստում շարունակվեց ամբաստանյալ Իսրայել Սարգսյանի հարցաքննությունը: