Շաուրմա, հարսանեկան փաթեթ, անվճար գերեզմանաքար՝ Թուրքիայում դոլարը լիրայով փոխանակողներին

Վերջերս Թուրքիայի նախագահ Ռեջեփ Թայիփ Էրդողանը դոլարի՝ օրեցօր բարձրացող կուրսը կանխելու նպատակով իր քաղաքացիներին հորդորել էր «բարձերի տակ պահած դոլարները փոխանակել լիրայով»: Քաղաքացիները, հետևելով իրենց նախագահի կոչին, շտապել են փոխանակման կետեր:

Մի շարք առևտրականներ անգամ փորձել են նպաստել նախագահի կոչին՝ իրենց հերթին ակցիաներ կազմակերպելով: Օրինակ՝ դոլարը լիրայի փոխանակողները, ներկայացնելով իրենց կտրոնները, տվյալ ակցիան կազմակերպողից կարող են ստանալ անվճար շաուրմա և թան, սանրվածք, հարսանեկան փաթեթ  և այլն:

Ակցիաներին ավելացել է ևս մեկը: Բուրսացի` շիրմաքար քանդակողն անվճար գերեզմանաքար է տրամադրում նրան, ով ներկայացնում է կտրոն՝ 2000 դոլարը լիրայի փոխանակելու մասին:  Քանդակագործի խոսքով՝ շատ քաղաքացիներ դրական են նայում այդ «ակցիային»:

Էրդողանի հայտարարությունից հետո երկրի տարբեր հատվածներում գերեզմանի քարեր պատրաստող քանդակագործները «Դոլարդ փոխանակիր, անվճար գերեզմանաքար ստացիր» գրությամբ գովազդային պաստառներ են փակցրել իրենց խանութների պատերին: