Ես միայն իմ գլխի տերը չեմ, ես ֆրակցիայի անդամ եմ. Հակոբ Բեգլարյան

Յուրաքանչյուր պետական հիմնարկի, նախարարության հիմնական գործառույթների 80 տոկոսից ավելին գնումներ են: «Դուք գիտեք` ես գնումների գործակալությունում եմ աշխատել, յուրաքանչյուր ոլորտի հետ կարող եմ խոսել»,- այսօր խորհրդարանում լրագրողներին ասաց ՀՀԿ-ական պատգամավոր Հակոբ Բեգլարյանը, ով նախկինում պետական գնումների գործակալության պետն էր:

Հարցին, թե այդ դեպքում ինքն ԱԺ ամբիոնից կբարձրաձայնի՞ կոռուպցիոն խնդիրների մասին, նա պատասխանեց. «Ես միայն իմ գլխի տերը չեմ, ես ֆրակցիայի անդամ եմ: Բոլոր հարցերը կքննարկենք: Անպայման առաջ եմ քաշելու յուրաքանչյուր հարց, որը անհանգստացնում է մեր երկրի բնակիչներին»:

Ճշտող հարցին` եթե ֆրակցիան չցանկանա, ապա ինքը կլռի կոռուպցիոն երևույթների մասին, Բեգլարյանն արձագանքեց. «Ոչ, բոլոր նեգատիվ երևույթների մասին բոլորս իրար հետ պետք է խոսենք»:

Պատգամավորը հրաժարվեց խոսել իր նախընտրական շտաբում տեղի ունեցած իրադարձությունների մասին: Հարցին, եթե դա ընտրակաշառք չէր, ապա աշխատավա՞րձ էր, պատասխանեց. «Ոչ»:

Հիշեցնենք, խորհրդարանական ընտրությունների ժամանակ մի խումբ անձինք խորընդոտել էին լրագրողների մուտքին Բեգլարյանի նախընտրական շտաբ, իսկ երբ լրագրողները ցուցակ և գումար էին հայտնաբերել, շտաբի աշխատակիցներն ասել էին, որ դա աշխատավարձի ցուցակ է: