Պուտինի կողքին չեմ եղել, չեմ լսել, որ Պուտինն ուղարկած լինի. Հակոբ Հակոբյան

Եթե մարդը դեռևս մի օր չի աշխատել, չաշխատածի, չկատարած աշխատանքի մասին որևէ մեկը որևէ բան չի կարող ասել. Yerkir.am-ի հետ զրույցում ասաց ՀՀԿ խմբակցության պատգամավոր Հակոբ Հակոբյանը/Պիվի Հակոբ/` չցանկանալով մեկնաբանել Կարեն Կարապետյանին վարչապետ նշանակելու փաստը:

«Բավական դրական կարծիք ունեմ Կարեն Կարապետյանի մասին` որպես անձնավորություն, նախկին աշխատավայրերում էլ լավ է իրեն դրսևորել: Այսքանը նոր վարչապետի մասին: Երբ կանցնի մեկ տարի, ոչ թե մեկ-երկու ամիս, նոր կխոսեմ նոր վարչապետի աշխատանքի մասին»,- ասաց նա:

Դիտարկմանը, թե նոր վարչապետն ունի ընդամենը 8 ամիս ժամանակ, արձագանքեց, որ 8 ամիսը 1 տարվան մոտ է: «Երբ աշխատի 8 ամիս, 8 ամսում ինչ-որ բան կերևա: Կձևավորվի նոր խորհրդարան, կլինեն նոր պատգամավորներ, և այն ժամանակ նրանք կգնահատեն Կարեն Կարապետյանի կատարած` 8 ամսվա աշխատանքը»,- ասաց պատգամավորը: 

Անդրադառնալով հարցին` արդյո՞ք կար վարչապետի հրաժարականի անհրաժեշտությունը, Հակոբյանը նշեց, որ արդեն նախկին վարչապետը, որին ինքը շատ հարգում է, ինքն է հրաժարական տվել, նրան աշխատանքից չեն հեռացրել: «Ես դեռևս նրա հետ չեմ հանդիպել և չգիտեմ` հրաժարականի պատճառը որն է: Ճիշտ կլինի նրանից հարցնել` եթե 8 ամիս էր մնացել ինչո՞ւ հրաժարական տվեց»,- ասաց նա:

Հակոբ Հակոբյանը տեղյակ չէ, թե ինչ նոր շունչ է բերելու նոր վարչապետը երկրին: «ՀՀԿ խորհրդի նիստում նա հաստատվեց` որպես վարչապետ, բայց ծրագիր չներկայացրեց, թեթևակի ելույթ ունեցավ, թեթևակի բաներ ասաց: Նա մոտ ժամանակներս ծրագիր կներկայացնի Ազգային ժողով, այդ ժամանակ նոր դրա մասին կխոսենք»,- ասաց պատգամավորը:

Ինչ վերաբերում է Աբրահամյանի թերացումներին, բացթողումներին, մեր զրուցակիցը նշեց, որ ցանկացած աշխատող մարդ սխալներ թույլ տալիս է: «Աշխատողն է սխալվում, չաշխատողը, բնականաբար, երբեք սխալ թույլ չի տա: Ինչ վերաբերում է նրան, թե Հովիկ Աբրահամյանը սխալներ թույլ տվել է, թե չի տվել, կարծում եմ, որ կոպիտ սխալներ թույլ չի տվել, իսկ հրաժարականի պատճառը, բնականաբար, ես չեմ կարող ասել»,- ասաց նա:

Անդրադառնալով Կարապետյանի` ՀՀ վարչապետի պաշտոնում նշանակվելու գործում Մոսկվայի դերին`  Հակոբյանն ասաց, որ Կարեն Կարապետյանը ՀՀ քաղաքացի է, ուրեմն ամեն հարց լուծվում է: «Կարեն Կարապետյանի ազգանվան վերջում, եթե ուզում եք իմանալ, յան է, ուրեմն հայ է: Կարապետյանը ՀՀ քաղաքացի է, ուրեմն ամեն հարց լուծվում է:  Ես Պուտինի կողքին չեմ եղել, չեմ լսել, որ Պուտինն ուղարկած լինի»,- ասաց նա` հավելելով. «Մարդը դեռևս չի սկսել աշխատանքը, և պետք չէ վատ բաներ տեսնել, եկեք կամենանք, որ նա եռանդով աշխատի կառավարությունում և նպաստի մեր երկրի զարգացմանը»:

Հակոբյանը հույս հայտնեց, որ Կարեն Կարապետյանին կհաջողվի ստեղծել այնպիսի պայմաններ, տնտեսությունը այնպիսի վիճակի հասցնել, որ հարկահավաքության խնդիրը մեզ մոտ կարգավորվի, ապա ավելացրեց. «Ի՞նչ կապ ունի` Կարեն Կարապետյանն է վարչապետը, թե` Հովիկ Աբրահամյանը:  Երբ մարդը նշանակվում է ցանկացած պաշտոնի` լինի հանրապետության նախագահ , վարչապետ, նախարար, թե` քաղաքապետ, պետք է թողնել, որ գոնե մեկ տարի աշխատի: Չի կարելի հարձակվել մարդու վրա, երբ նոր գործ է սկսել: Թողնենք` աշխատի, հետո գնահատական տանք: Ընդհանրապես, եթե մարդը մի հատ վատ բան է արել, խոսենք դրա մասին, եթե 5 լավ բան է արել, գոնե հինգից 3 արված լավ բանի մասին խոսենք»: