Ձայնային ինժեներիայի դասընթացներ` Հայաստանում

«ԴիՋի Կոնտակտ» ընկերության հրավերով` 2017 թ. մայիսի 2-ից 4-ը Հայաստանում էր The Prodigy աշխարհահռչակ խմբի ձայնային ինժեներ Ջոն Բարթոնը: Ընկերությունը, անգլիական SoulSound ընկերության հետ համատեղ, կազմակերպել էր ձայնային ինժեներիայի եռօրյա խտացված դասընթացներ: Դա նման բարձր մակարդակով կազմակերպված առաջին սեմինարն էր Հայաստանում, որի հիմնական նպատակը Հայաստանում ձայնային ինժեներիայի զարգացումն է, ինչպես նաեւ երիտասարդ ձայնային ինժեներներին բնագավառի նորագույն տեխնիկաներին եւ տեխնոլոգիաներին ծանոթացնելը:

Մասնակցում էին 13 երիտասարդ մասնագետներ, կար նաեւ օտարերկրյա երկու մասնակից Ֆրանսիայից եւ Իրանից: Սեմինարի վերջին օրն ավարտվեց պրակտիկ դասով:  Այդ օրը սեմինարի հյուրն էին նաեւ «Թումո»-ի սաները: Բոլոր մասնակիցները տպավորված էին Ջոնի պրոֆեսիոնալիզմով։ Վարպետության այս դասերը շատ օգտակար եւ անհրաժեշտ գնահատվեցին, իսկ սեմինարի ավարտին հանձնվեցին մասնակցության վկայականներ:

Հյուրը Հայաստանից հեռացավ տպավորված եւ հիացած երկրի մշակույթով ու երիտասարդներով` իր այցը գնահատելով` «fantastic»:

«ԴիՋի Կոնտակտ»-ը նախատեսում է նմանատիպ սեմինարները եւ վարպետության դասերը դարձնել շարունակական: