Մայիսի մեջ օր կընտրվի` համապետական շաբաթօրյակ հայտարարելու համար

Կառավարության նիստի օրակարգին անցնելուց առաջ վարչապետը հանձնարարական տվեց աղբահանության և սանիտարական մաքրման աշխատանքների վերաբերյալ: Նրա խոսքով` կառավարությունը տրամադրված է աղբահանության և սանիտարական մաքրման աշխատանքներն անհրաժեշտ մակարդակի բերելու, անկանոն թափված աղբի նկատմամբ անհանդուրժող վերաբերմունք ձևավորելու, օրինազանցների նկատմամբ վարչարարության խստացման ուղղությամբ:

«2017թ. ապրիլին տվել ենք «Մաքուր Հայաստան» ծրագրի մեկնարկը, հաստատված է միջոցառումների ծրագիրը: Նշված միջոցառումները արդյունավետորեն համակարգելու համար հանձնարարում եմ ՏԿԶ նախարարին` մեկամսյա ժամկետում ներկայացնել առաջարկություններ ՏԿԶ նախարարությունը աղբահանության և սանիտարական մաքրման պետական լիազոր մարմին ճանաչելու վերաբերյալ: Մենք, փաստորեն, առ այսօր նման մարմին չունեինք, հսկողության տակ ենք դնելու «Մաքուր Հայաստան» ծրագիրը` շատ կոշտ ձևով»,- ասաց վարչապետը:

Նա նաև հավելեց, որ մայիսի 20-ին կհայտարարեն հանրապետական շաբաթօրյակ: «Այդ շաբաթօրյակը չպետք է ձևական լինի, պետք է ներկայացնել համապատասխան տեխնիկա, շինարարական աղբը հանելու համար տեխնիկա և այլն»,- ասաց վարչապետը: