«Մարդու, ում վարկանիշն անգամ իր գյուղում է ընկած, պատվավոր երևանցու կոչում են տալիս»

Գրականագետ Դավիթ Գասպարյանի կարծիքով` Երևանը մեր տներից մաքուր պետք է լինի: Այսօր  նա լրագրողների հետ զրույցում կարծիք հայտնեց, որ դրան հասնելու համար պետք է քայլեր անի թե՛ ավագանին, թե՛ մենք` բոլորս, ըն որում` Երևանի ավագանին առավելագույնը պետք է անի քաղաքի համար:

Yerkir.am-ի հարցին, թե ինչպե՞ս կգնահատի արվեստի ոլորտի մարդկանց գործունեությունն ավագանու կազմում և հիշո՞ւմ է արդյոք ինչ-որ դեպք, երբ նրանք երևանցիների բարձրացրած խնդիրների լուծմամբ են զբաղվել կամ իրենք են ինչ-ինչ նախաձեռնություններով հանդես եկել, Գասպարյանը դժվարացավ պատասխանել` նման դեպք հիշել: «Թող ամեն մեկին պատվավոր երևանցու կոչում չտան: Պատահական մարդկանց կոչումներ տվեցին ու դրանով վարկաբեկեցին շատերին: Մարդու, ում վարկանիշն անգամ իր գյուղում է ընկած, կոչում են տալիս: Իրավունք չունենք այսքան ընկնելու, և կա սահման, որի եզրին պետք է ուղղակի կանգ առնենք: Գաղտնի են որոշում` ով է Երևանի պատվավոր քաղաքացի, թող քննարկման դնեն հարցը, մենք էլ կիմանանք` ով ինչի է արժանի»,- ասաց գրականագետը: