97 բնակավայրեր կսպասարկեն ներմարզային հարմարավետ ու ժամանակակից երթուղիներ. վարչապետ

Այսօր կառավարության նիստում, նախքան օրակարգին անցնելը, վարչապետ Կարեն Կարապետյանը հանձնարարական տվեց մի կարևոր խնդրի մասին, այն է` ներմարզային ճանապարհների խնդիրները և ճանապարհաշինությունը:

«Հայաստանի բնակավայրների տրանսպորտային հասանելիության մակարդակը բավարար չէ` 97 համայնք չի սպասարկվում մարզային երթուղիներով, այդ իսկ պատճառով շատ անհրաժեշտ ենք համարում մարզային երթուղային ցանցի, մասնավորապես` ներմարզային երթուղային ցանցի արդիականացմանն ուղղված անհապաղ աշխատանքներ իրականացնելը»,- ասաց վարչապետը` հավելելով, որ թեև տրանսպորտի և կապի նախարարն արդեն ստացել է համապատասխան հանձնարարականը, սակայն տրանսպորտային համակարգի բարեփոխումները սերտորեն կապված են նաև միջպետական, հանրապետական նշանակության և համայնքային ճանապարհների տեխնիկական վիճակի հետ: Ուստի տվյալ խնդրի կապակցությամբ ժամանակն է սահմանել խնդրի լուծման հստակ վերջնաժամկետները:

Վարչապետը հանձնարարեց ՀՀ տրանսպորտի, կապի և տեղեկատվական տեխնոլոգիաների նախարարին՝ երեքշաբաթյա ժամկետում ամփոփել և կառավարության աշխատակազմին ներկայացնել հանրապետության և մարզերի համար նախատեսված ուղևորափոխադրման երթուղային ցանցի նոր տարբերակ, որի պարագայում կլուծվի նշված 97 բնակավայրերի ներմարզային երթուղիներով, ժամանակակից և հարմարավետ տրանսպորտային միջոցներով սպասարկման հարցը:

Հանձնարարվեց նաև երեքշաբաթյա ժամկետում ակտիվացնել Հայաստանի Հանրապետությունում միջպետական և հանրապետական նշանակության ճանապարհների` ՀՀ պետական բյուջեից և վարկային ծրագրերով ֆինանսավորվող շինարարական և վերականգնողական աշխատանքները և կառավարության աշխատակազմ ներկայացնել տվյալ աշխատանքների վերաբերյալ ամփոփ տեղեկատվություն 2017 թվականին նախատեսված աշխատանքների վերաբերյալ:

Բացի այդ` մեկամսյա ժամկետում մշակել և կառավարության աշխատակազմ ներկայացնել «ՀՀ ճանապարհների շինարարության եւ պահպանման» հիմնադրամի ստեղծման անհրաժեշտության վերաբերյալ հիմնավորումը՝ հաշվի առնելով միջազգային լավագույն փորձը, ներկայացնել առաջարկություն նշված հատուկ հիմնադրամի ֆինանսական ռեսուրսների ապահովման և հնարավոր աղբյուրների վերաբերյալ: