Հասարակ քաղաքացիների ու գյուղացիների գերակշիռ մասը հրաշք մարդիկ են. Աղվան Վարդանյան

Այսօր լրագրողների հետ հանդիպեց ՀՅԴ Գերագույն մարմնի ներկայացուցիչ Աղվան Վարդանյանը` ամփոփելով ՀՅԴ նախընտրական քարոզարշավը:

Խոսելով ընտրակաշառքների մասին` նա կարծիք հայտնեց, որ միշտ էլ ընտրակաշառք առաջարկող լինելու է, կարևորն այն է, որ չվերցնեն: «Ինչպես Հրանտ Մարգարյանն իր հարցազրույցում ասաց` մեկ անգամ կարող են, չէ՞, կաշառք առաջարկողի դեմքին շպրտել փողը ու ասել. «Բավական է, հերիք է,  այլևս իմ ձայնը չեմ վաճառում»»,- ասաց Աղվան Վարդանյանը` հավելելով, որ բոլոր ուժերն են հասկանում մեկ ձայնի արժեքը, քանի որ այս ընտրությունները համամասնական են ու վարկանիշային:

Նրա խոսքով` յուրաքանչյուր ընտանիքի հետ աշխատում են մի քանի քաղաքական ուժեր: «Հաջորդ ընտրություններին վստահ եմ, որ քաղաքացիներն արդեն լիարժեք կգիտակցեն իրենց ձայնի արժեքը ու չեն ենթարկվի ընտրական կամ վարչական ռեսուրսին»,- ասաց Աղվան Վարդանյանը` հարց հնչեցնելով, թե այս ծանր վիճակում գտնվող երկրում որտեղի՞ց այդ գումարները, որոնք վերածվում են ընտրակաշառքի:

Ինչ վերաբերում է ընտրախախտումներ իրականացնողներին ու ընտրակաշառք բաժանողներին պատասխանատվության ենթարկելուն, Աղվան Վարդանյանը նշեց, որ պատասխանատվությունը, ԸՕ փոփոխություններով, ավելի խստացվել է` կարող են ոչ թե տուգանքներով ազատվել, այլ բանտում հայտնվել:

Հարցին, թե ի՞նչ խորհրդարան է պատկերացնում, Աղվան Վարդանյանը պատասխան հարց հնչեցրեց` իսկ ի՞նչ խորհրդարան է պատկերացնում ՀՀ քաղաքացին. արդյո՞ք պատկերացնում են խորհրդարան, որի պատգամավորների 60 տոկոսը 5 տարվա մեջ մեկ բառ չի ասել, միայն կոճակ է սեղմել ու նեղ անձնական շահերով առաջնորդվել, արդյո՞ք խորհրդարանում պատկերացնում են այն ուժերին, որոնք որոշ ժամանակ անց մասնատվում են: Ըստ նրա` քաղաքացին ուզում է տեսնել խորհրդարան, որը ազգի պատմության ու մշակույթի արտապատկերումը կունենա՞, թե՞ խորհրդարան, որը կլինի դրա հակապատկերը:

«Նոր պառլամենտը` իր աշխատանքով, իր քննարկումներով, բանավեճերով,  փաստարկներով, պետք է հասարակ քաղաքացուն ապացուցի, որ նա շատ ավելի լավ կառավարման համակարգ է ընտրել: Ես իդեալիստ չեմ, խորհրդարանի պատկերը իդեալական չեմ տեսնում, բայց ես վստահեցնում եմ, որ բոլորին  հայտնի վարկանիշային բազմաթիվ թեկնածուներից ոչ բոլորը կարող են հայտնվել խորհրդարանում»,- ասաց Աղվան  Վարդանյանը:

Հարցին, թե ի՞նչ է ցանկանում ընտրողը, արդյո՞ք գաղափարների ու տեսլականի հետաքրքրվածություն կար,  նա պատասխանեց, որ հասարակ քաղաքացիների, գյուղացիների գերակշիռ մասն ազնիվ, իր աշխատանքով մեծ դժվարությամբ ընտանիք պահող, հրաշք մարդիկ են, և սխալ է այն կարծիքը, թե մեր ժողովուրդը լավը չէ: Պարզապես էլիտայի խնդիրն է` այդ մարդկանց բարձրացնել, ոչ թե փորձել իջեցնել ու նվաստացնել, որ հետո կարողանան իշխել:

«Հանրապետության տարբեր մասերում եղանք, մարդիկ շատ էլ լավ տարբերում են թացը չորից, սուտը` կեղծից, ամբոխավարությունը` իրականությունից: Հայտնի խոսք կա, որ ժողովուրդը չի կարող լինել ամբողջովին վատը կամ ամբողջովին լավը: Բոլոր ժողովուրդների մեջ էլ կան նվիրյալներ, ծառայության պատրաստներ, պետական-ազգային մտածություն ունեցողներ, նպատակներն անձից վեր դասող մարդիկ, և լինում են նաև տականքներ, սրիկաներ, խաբողներ, մարդիկ, ովքեր, իրենց շահից բացի, այլ բան չեն տեսնում: Կախված նրանից, թե քաղաքական, ռազմական, տնտեսական, մշակութային էլիտայի մեջ ո՞ր տեսակն է գերակշռում, ժողովուրդն էլ մեծ մասամբ  սկսում է նմանվել  այդ տեսակին: Հիմա մենք որակական փոփոխությունների կարիք ունենք, մտածողության, հոգեբանության, մշակույթի փոփոխության կարիք ունենք»,- ասաց Աղվան Վարդանյանը: