Շահառուների գերակշիռ մասը նախընտրել է բնակարանի գնման վկայագրեր. Վիգեն Սարգսյան

Կառավարության վաղվա նիստի օրակարգում պաշտպանության նախարարությունը ներառել է որոշում, որն ուղղված է բնակարանի կարիքավոր` զոհված (մահացած) և առաջին, երկրորդ և երրորդ կարգի հաշմանդամ զինծառայողների ընտանիքների սոցիալական վիճակի բարելավմանը: Նախատեսվում է սեփականության իրավունքով անհատույց բնակարանի կամ բնակարան ձեռք բերելու նպատակով բնակարանների գնման վկայագրերի հատկացման միջոցով անհատույց ֆինանսական աջակցության տրամադրում:

«Մենք լուծել ենք զոհված ու առաջին կարգի հաշմանդամ դարձած զինծառայողների ընտանիքների բնակարանային պայմանների բարելավման ու անօթևան ընտանիքների բնակարանավորման խնդիրը: Նախատեսվում էր, որ հիմնականում Երևանում առաջարկելու ենք պատրաստի բնակարաններ, բայց շահառուների գերակշիռ մասը նախընտրել է բնակարանի գնման վկայագրեր: Այդ գործընթացն ամբողջացվել է, ու գումարի մի մասով նախատեսվում է բնակարաններ ձեռք բերել՝ հաջորդ տարի ծրագիրը շարունակելու համար»,- ասաց պաշտպանության նախարար Վիգեն Սարգսյանը: