Ընտրություններին մոտենում ենք մեծ պատասխանատվությամբ. Արծվիկ Մինասյանը` դիլիջանցիներին

Հայտնել ենք, որ այսօր Տավուշի մարզի Դիլիջան քաղաքում ընտրողների հետ հանդիպում են ունեցել բնապահպանության նախարար Արծվիկ Մինասյանը և ՀՅԴ Բյուրոյի անդամ Սպարտակ Սեյրանյանը:

Արծվիկ Մինասյանը, անդրադառնալով Տավուշի մարզում ՀՅԴ-ի կողմից առաջադրված ռեյտինգային թեկնածուներին, նշեց, որ այսպիսի թիմը պատիվ կբերի ցանկացած քաղաքական ուժի:

Ըստ նրա` ՀՅԴ-ն խորհրդարանական ընտրություններին մոտենում է մեծ պատասխանատվությամբ: «Անկախությունից հետո` 25 տարվա մեջ, մեր երկրում դրական շարժեր չեն եղել: Շատ կարևոր է, որ նախագահը գնաց սահմանադրական փոփոխությունների, և անցում ենք կատարում խորհրդարանական համակարգի: Սա եղել է ՀՅԴ-ի առաջարկով, և այլևս ունենք խորհրդարանական համակարգ»,- նշեց Մինասյանը:

Նրա խոսքով` խորհրդարանում այնպիսի մարդիկ են պետք, որպեսզի կարողանան առաջ մղել երկրի կայուն զարգացումը և անվտանգությունը: «Մեր տնտեսությունը կառուցված է նեղ տնտեսական շահի մոդելի վրա, այսինքն` միայն նեղ խմբային շահն է առաջնորդողը: Արդյունքում` մեր տնտեսության մեջ ունենք բազում հարցեր՝ մենաշնորհից սկսած, էկոլոգիական խնդիրներով վերջացրած»,- ընդգծեց Մինասյանը:

Նա անդրադարձավ երկրում առկա խնդիրներին, մասնավորապես` բնապահպանական խնդիրներին՝ նշելով, որ ընդերքը միայն այս սերնդի սեփականությունը չէ, այն մեր հասարակության սեփականությունն է: Ըստ Մինասյանի` հարկավոր է ընդերքի չարաշահումը զսպել և բնությունը վերադարձնել հայ մարդուն:

Նախարարն անդրադարձավ նաև Դիլիջանի խնդիրներին: «Դիլիջանը կարող է մրցել լավագույն զբոսաշրջային քաղաքների հետ: Ինչո՞ւ չի արվել, որովհետև առաջնորդվել են նեղ անձնական շահերով: Դիլիջանը պետք է վերականգնի տուրիստական երբեմնի հեղինակությունը: Ես հայտարարում եմ, որ մեր նպատակն այսօր սա է` վերականգնել Դիլիջանի, «Դիլիջան ազգային պարկի» ամբողջական ռեսուրսները»,- ասաց նա, ապա հավելեց. «Մենք ի վիճակի են դա անել, բայց միասնական պետք է անենք: Եթե միասնական չեղանք, արդյունք չի տա»:

Այնուհետև Մինասյանը նշեց, որ ինչքան շատ ՀՅԴ-ն ներկայացված լինի խորհրդարանում, այնքան իրենք կկարողանան նոր ծրագրեր իրականացնել: «Դրա համար մեզ ձեր աջակցությունը շատ անհրաժեշտ է: Եթե այս գաղափարները ձեզ ընդունելի են, եթե մեր թիմը ձեզ համար նախընտրելի է, ապա ապրիլի 2-ը կարող է լինել զարթոնքի սկիզբ, իսկ զարթոնք կարող է լինել ՀՅԴ-ի` պատկառելի ձայն ստանալու դեպքում»,- ասաց նա: