Կազմակերպչական հարցեր էին քննարկվում. Դավիթ Հարությունյանը` Սերժ Սարգսյանի և ՀՀԿ ռեյտինգային թեկնածուների հանդիպման մասին

Հայաստանի Հանրապետական կուսակցության գլխավոր գրասենյակում տեղի էր ունենում տարածքային թեկնածուների և ՀՀ Նախագահ Սերժ Սարգսյանի հանդիպումը:

Հանդիպումից հետո Կառավարության աշխատակազմի ղեկավար-նախարար Դավիթ Հարությունյանը լրագրողների հետ զրույցում նշեց, որ կազմակերպչական հարցեր էին քննարկվում:

Հարցին` ինչ-որ հստակ հանձնարարականնե՞ր է տրվել, Հարությունն արձագանքեց, «Այո, ներկուսակցական»:

Լրագրողի ճշտող հարցին` կապված էր արդյո՞ք ներկուսակցական մրցակցության հետ հանդիպումը, Հարությունյանը պատասխանեց, որ մրցակցությունը բնական է և որ մրցակցություն պետք է լինի, այն նախատեսված է ընտրական օրենսգրքով:

Հարցին` եղա՞վ անդրադարձ Մասիսի դեպքին, Հարությունյանը նշեց, որ առանձին անդրադարձ է լինելու նման դեպքերին:

Իսկ արդյոք նկատողություններ ու զգուշացումներ տրվել են նախագահի կողմից, Հարությունյանը չցանկացավ պատասխանել` ասելով, որ դրանք ներկուսակցական հարցեր են:

Հիշեցնենք, որ միջադեպ էր տեղի ունեցել Արարատի մարզի Մասիս քաղաքում: Նախընտրական կրքերն այնքան էին թեժացել, որ ծեծկռտուք էր սկսվել հանրապետական թեկնածուների թիմակիցների միջև:

Իսկ այսօր նախագահ Սերժ Սարգսյանը հանդիպում է կազմակերպել տարածքային թեկնածուների հետ, որպեսզի նման դեպքեր այլևս չկրկնվեն: