Հնագետները միաձայն դեմ են արտահայտվել Ակրոպոլիսում Gucci-ի նորաձևության ցուցադրությանը

Հունաստանի հնագիտական կենտրոնական խորհրդի անդամները միաձայն դեմ են արտահայտվել Ակրոպոլիսում Gucci-ի նորաձևության ցուցադրությանը. հայտնում է РИА Новости-ն:

«Ակրոպոլիսի հուշարձանների հատուկ մշակութային բնույթը չի համապատասխանում նման իրադարձությանը, քանի որ դրանք համաշխարհային ժառանգության եզակի նմուշներ են»,- ասվում է որոշման մեջ:

Gucci ընկերությունը խնդրել էր թույլատրել Ակրոպոլիսում ցուցադրել իր Gucci Cruz 2018 հավաքածուն: Դեֆիլեն ծրագրվում էր անցկացնել Պարթենոնի և Էրեխթեյոնի միջև 2017-ի հունիսի 1-ին, պետք է հրավիրվեր 300 հյուր: Որպես Հունաստանի մշակութային ժառանգության նկատմամբ իր հարգանքի հավաստիք` ընկերությունը պատրաստ էր 2 մլն եվրոյի դրամաշնորհ տրամադրել Ակրոպոլիսում վերականգնողական աշխատանքներ իրականացնելու համար:

Ի դեպ, այլ վայրում, օրինակ` Զևսի տաճարի մոտ միջոցառումն անցկացնելու առաջարկը Gucci-ին չի հետաքրքրել:

Նշենք, որ անցյալ տարի ընկերությունը ցուցադրություն էր կազմակերպել Լոնդոնի Վեստմինստերյան աբբայությունում: