Հանրային պաշտպանը երկու անգամ տեսակցել է ադրբեջանցի դիվերսանտին

Փետրվարի 1-ին ԼՂՀ Մարտակերտի շրջանի Թալիշ համայնքի ուղղությամբ դիվերսիայի փորձ ձեռնարկած, ներկայումս կալանքի տակ գտնվող Էլնուր Հուսեյնզադեի շահերը ներկայացնում է ԼՂՀ հանրային պաշտպանի գրասենյակի պաշտպան Արկադի Իսրայելյանը: Նա Yerkir.am-ին հայտնեց, որ երկու անգամ այցելել է ադրբեջանցի զինծառայողին:

Ըստ Իսրայելյանի` Հուսեյնզադեն առողջական խնդրից չի դժգոհել: Քրեական վարույթն իրականացնող մարմինը ադրբեջանցի դիվերսանտին է տրամադրել նաև ադրբեջաներեն լեզվով թարգմանված` որպես մեղադրյալ ներգրավելու մասին որոշման պատճենը, նրա իրավունքների և պարտականությունների ցանկը:

Նշենք, որ օրեր առաջ նրան էր այցելել նաև ԼՂՀ մարդու իրավունքների պաշտպան Ռուբեն Մելիքյանն ու նրան փոխանցել Եվրոպական կոնվենցիան՝ ադրբեջաներեն լեզվով։

2017թ. փետրվարի 1-ին ԼՂՀ Մարտակերտի շրջանի Թալիշ համայնքի ուղղությամբ Ադրբեջանի Հանրապետության զինված ուժերի մի խումբ զինծառայողներ, օգտվելով մառախլապատ եղանակից, ձեռնարկել էին դիվերսիայի փորձ: Փորձը խափանվել էր Պաշտպանության բանակի` Արցախի պետական սահմանի պահպանությունն իրականացնող ստորաբաժանման կողմից: Նույն օրը` ժամը 15:00-ի սահմաններում, Պաշտպանության բանակի մարտական դիրքերից մեկի պահպանության տեղամասում հայտնաբերվել և ԼՂՀ ԱԱԾ բերման է ենթարկվել ԼՂՀ պահպանվող պետական սահմանն ապօրինի հատած դիվերսիոն խմբի անդամ, Ադրբեջանի Հանրապետության քաղաքացի, Ադրբեջանի Հանրապետության զինված ուժերի 157 մոտոհրաձգային բրիգադի հետախուզական վաշտի զինծառայող Էլնուր Էլման օղլը Հուսեյնզադեն:

Փաստի առթիվ հարուցվել էր քրեական գործ ԼՂՀ Քրեական օրենսգրքի 33-317-րդ հոդվածով(դիվերսիայի փորձ կատարելը) եւ 350-րդ հոդվածի 1-ին մասով (Առանց սահմանված փաստաթղթերի կամ առանց պատշաճ թույլտվության Լեռնային Ղարաբաղի Հանրապետության պահպանվող պետական սահմանն ապօրինի հատելը):

Փետրվարի 4-ին ԼՂՀ ընդհանուր իրավասության առաջին ատյանի դատարանը Էլնուր Հուսեյնզադեի նկատմամբ որպես խափանման միջոց էր ընտրել երկամսյա կալանքը: