Հայ «դիվերսանտին» իբր բացահայտող անհաջող բեմականացում՝ ադրբեջանական ձևով

Այսօր Արցախի ՊՆ-ն հերքել էր ադրբեջանական կողմի տարածած հերթական ապատեղեկատվությունը, թե իբր կանխվել է դիվերսիոն ներթափանցման փորձ, և գերեվարվել է մեկ հայ զինծառայող: Հիշյալ ապատեղեկատվությունից հետո  ադրբեջանական կողմը «հայ դիվերսանտին» «բացահայտող» տեսանյութ ու լուսանկար է տարածել:

Ըստ ադրբեջանական լրատվամիջոցների՝ «գերի ընկած հայ դիվերսանտը» 1974-ին ծնված` Նոյեմբերյանի շրջանի Դովեղ գյուղի բնակիչ Զավեր Կարապետյանն է:

Yerkir.am-ի հետ զրույցում Դովեղի գյուղապետ Սամվել Գորգինյանը հայտնեց, որ իրենց գյուղը փոքր է, և իրենց համայնքում առհասարակ Կարապետյան ազգանուն չկա, ավելին` նման արտաքինով քաղաքացու իրենք երբեք չեն տեսել:

ՀՀ ՊՆ մամլո խոսնակ Արծրուն Հովհաննիսյանը Yerkir.am-ի հետ զրույցում հերթական անգամ հերքեց զինվորականի գերեվարվելու վերաբերյալ լուրը, իսկ հրապարակված տեսանյութը որակեց որպես անհաջող թատրոն:

ՀՀ ոստիկանությունից էլ հայտնեցին, որ վերջին օրերին քաղաքացիական անձի կողմից սահմանն անցնելու վերաբերյալ որևէ տվյալ չի ստացվել:

Անդրադառնալով ադրբեջանական կայքերի կողմից հրապարակված տեսանյութին` նկատենք, որ բացի նրանից, որ տեսանյութը փնթի մոնտաժված է, ներկայացված «դիվերսանտն» ընդհանրապես հայի արտաքին չունի, նրա հագին եղած զրահաբաճկոնն ու կամուֆլյաժը տարբերվում են հայկական ԶՈւ-ի համազգեստից:

Տեսանյութը լսելիս տպավորություն է, թե  տղամարդու բերանի շարժումներն արհեստական են, և հասկանալի չէ` խոսում է, թե` ոչ: Ավելին` ենթադրյալ թարգմանիչը չի սպասում, որ «դիվերսանտն» ասի իր միտքը, և միանգամից թարգմանում է, այնպիսի տպավորություն է, որ նա ուրիշ բան է թարգմանում:

Ինչևէ, սրանք դեռևս հակառակորդի քարոզչամեքենայի կողմից թույլ տրված` ոչ մասնագիտական աչքով նկատված վրիպակներն էին: Այս տեսանյութը համապատասխան փորձագետների և մասնագետների ծիծաղը կարող է առաջացնել: