Լոնդոնաբնակ փորձագետը հնագույն ձեռագրում հայտնաբերել է Ալեքսանդր Մեծի կտակի հայերեն թարգմանությունը

Լոնդոնում գործող փորձագետ Դևիդ Գրանտը պնդում է, որ վերջապես հայտնաբերել է Ալեքսանդր Մակեդոնացու կտակն ու վերջին ցանկության վկայականը նրա մահից 2000 տարի անց:

Ինչպես հայտնում է Horizon Weekly-ն` վկայակոչելով The Daily Mail պարբերականի հրապարակումները, մակեդոնացի արքայի վերջին ցանկությունը, հավանաբար, գրառվել է հնագույն հայկական ձեռագրի տողերում:

Վաղուց փնտրվող կտակում Ալեքսանդր Մեծը ներկայացրել է իր ծրագրերը` կապված իր ղեկավարած հույն-պարսկական կայսրության հետ: Այն բացահայտում է նաև արքայի ցանկությունները  իր հուղարկավորության մասին, ինչպես նաև իր մեծ կայսրության իշխանավորներին:

Փորձագետի խոսքով` Ալեքսանդր Մակեդոնացու կտակը  հայտնաբերվել է հնագույն ձեռագրում, որը հայտնի է Alexander Romance անունով:

Փաստաթուղթը գրված է հին հայերենով և թարգմանվել է հունարենից: Տվյալ փաստաթուղթը հիմնված է Մակեդոնացու կտակի վրա, որը հին աշխարհի ամենահայտնի քաղաքական մանդատներից է:

Այն փաստը, որ «Ալեքսանդրի վարք»-ը հիմնված է մեծ մասամբ  առասպելների վրա, թույլ է տալիս ենթադրել, որ կտակի բնօրինակը դարերի ընթացքում փոփոխությունների է ենթարկվել: Հավանաբար, դրա վերջին տարբերակն է տեղ գտել վեպում: