Հայաստանը Չինաստանում առևտրական կցորդ կունենա

Կառավարության վաղվա նիստի օրակարգում ՀՀ տնտեսական զարգացման և ներդրումների նախարարությունը ներառել է որոշում, որի համաձայն Չինաստանում , Պեկինում, ՀՀ դեսպա­նության շենքում ստեղծվում է ՀՀ  առևտրական կցորդի հաստիք :

 «Չինաստանի Ժողովրդական Հանրապետությունում Հայաստանի Հանրապետության առևտրական կցորդի հաստիք ստեղծելու մասին» Հայաստանի Հանրապետության կառավարության որոշման նախագիծը մշակվել է Հայաստանի և Չինաստանի միջև գործարար նախաձեռնությունների ակտիվացման և առևտրատնտեսական համագործակցության ընդլայնման նպատակով:

Առևտրական կցորդի պահպանման ծախսերը սահմանված են  41.8 մլն դրամի չափով:

Ըստ հիմնավորման, առևտրական կցորդի հաստիքի ստեղծումը թույլ կտա առավել արդյունավետ ներկայացնել Հայաստանի Հանրապետության տնտեսական շահերը առևտրին և տնտեսական համագործակցության այլ ձևերին առնչվող բոլոր ոլորտներում, կդյուրացնի հայկական և չինական տնտեսվարող սուբյեկտների կողմից առևտրական, տնտեսական և գիտատեխնիկական համագործակցության բնագավառում գործարքների իրականացումը  և կօժանդակի միմյանց միջև կապերի ստեղծմանը:             

Առևտրական կցորդի հաստիքի ստեղծումը հնարավորություն կտա նաև առավել օպերատիվ տեղեկատվություն ստանալ Չինաստանի տնտեսական իրավիճակի, արտաքին տնտեսական գործունեության ոլորտը կարգավորող օրենսդրության մասին, ինչպես նաև Հայաստանի վերաբերյալ այդպիսի տեղեկություններ հաղորդել Չինաստանի շահագրգիռ մարմիններին:

Կցորդի հաստիքի ստեղծումը կնպաստի նաև Հայաստանի Հանրապետության կառավարության և Չինաստանի Ժողովրդական Հանրապետության կառավարության միջև առևտրատնտեսական համագործակցության մասին 2013 թվականի սեպտեմբերի 10-ին ստորագրված Համաձայնագրի դրույթների իրականացմանը: