Սուրիկ Խաչատրյանից ակնկալիքները չեն փոխվել. ՀՀԿ-ն սպասում է նրա հեղինակության և ներուժի գործադրմանը

Օրեր առաջ ՀՀԿ Սյունիքի տարածքային կազմակերպության խորհրդի նախագահ է ընտրվել Սյունիքի մարզպետ Վահե Հակոբյանը: Հիշեցնենք, որ այդ պաշտոնը զբաղեցնում էր նախկին  մարզպետ Սուրիկ Խաչատրյանը, ով ՀՀԿ տարածքային  կազմակերպության՝ վերջերս կայացած խորհրդի նիստի ընթացքում ինքնաբացարկ էր հայտնել:

Yerkir.am-ը  ՀՀԿ-ական պատգամավոր Սուքիաս Ավետիսյանից հետաքրքվեց՝ մտավախություն չունե՞ն, որ Սուրիկ Խաչատրյանի՝ այդ պաշտոնից հեռանալը կարող է պատճառ դառնալ, որ սյունեցիները քիչ քվեարկեն ՀՀԿ-ի օգտին, քանի որ Խաչատրյանը կարողանում էր ձայներ ապահովել սեփական կուսակցություն համար: Ավետիսյանի խոսքով՝ ՀՀԿ-ն, ինչպես ցանկացած որոշում, այնպես էլ այս որոշումն ընդունելիս ծանրութեթև է արել: «Հավատացեք՝ ՀՀԿ-ն շատ լավ ծանրութեթև է անում, նոր փոփոխություններ անում: Հետո` Սուրիկ  Խաչատրյանը, անկախ նրանից` տարածքային կառույցի ղեկավար կլինի, թե չի լինի,  ունի  համապատասխան ներուժ, և իր ներուժը  կօգտագործի կուսակցությանը օգտակար լինելու  համար: Այնպես որ`  այստեղ ավելի շատ  կա անձի գործոնը: Կարող է տարածքային կառույցի ղեկավար լինել, բայց չկարողանալ լուրջ  բան անել, բայց կարող է տարածքային կառույցի  ղեկավար չլինել, բայց  օգտակար լինել: Հիմա այստեղ խոսքը Սուրիկ Խաչատրյան անձի մասին է, ով ցանկացած ժամանակ հնարավորություն ունի իր կուսակցությանն օգտակար լինելու»,- ասաց ՀՀԿ-ականը:

Դիտարկմանը՝ եթե Սուրիկ Խաչատրյանից եք ակնկալում ներուժի կիրառում, այդ դեպքում ստացվում է՝ Վահե Հակոբյանի նշանակումը ձևական էր, և էական ակնկալիքներ չկան նրանից, Ավետիսյանը պատասխանեց. «Երկար  տարիներ Սուրիկ Խաչատրյանը եղել է ՀՀԿ-ի անդամ, մարզային  կառույցի և կուսակցության ակունքներում եղած մարդ է: Նա հիմա էլ կշարունակի օգտակար լինել կուսակցությանը: Վահե Հակոբյանն էլ մարզպետ է, նաև` տարածքային կառույցի ղեկավար, բնական է, որ իր ունեցած հնարավորությունները պետք է օգտագործի, որ իր ընտրատարածքում ձայներ բերի: Դա նորմալ երևույթ է»:

Պատգամավորը նշեց նաև, որ Սուրիկ Խաչատրյանից ՀՀԿ-ի ակնկալիքները չեն փոխվել: «Նա անձ է, ով ունի հնարավորություն, երկար տարիներ աշխատել է, ունի հեղինակություն և կարող է  իր հեղինակությունով օգտակար լինել կուսակցությանը»,- ասաց ՀՀԿ-ականը:

Ի դեպ, Yerkir.am-ը կապ հաստատեց Սյունիքի նախկին մարզպետ Սուրիկ Խաչատրյանի հետ, ով չցանկացավ պատասխանել որևէ հարցի` նշելով, որ զբաղված է և ժամանակ չունի: