Այս ամսվա ընթացքում սպասվում է Իրանի նախագահի այցը Հայաստան

Ազգային ժողովի փոխոսնակ Էդուրդ Շարմազանովն այսօր խորհրդարանում, անդրադառնալով Իրանի նախագահի՝ Հայաստան այցին, լրագրողներին ասաց, որ և՛ իրանական, և' հայկական կողմի մոտ շատ լուրջ ցանկություն կա զարգացնելու բարեկամական հարաբերությունները` թե' տնտեսական և թե' քաղաքական:

«Իրանը շատ առանցքային դերակատար է տարածաշրջանում` ոչ միայն որպես մեր հարևան երկիր, այլև, առհասարակ, մահմեդական աշխարհում: Մեր շահերից է բխում շարունակել զարգացնել բարեկամական հարաբերությունները: Այս ամսվա ընթացքում սպասվում է Իրանի նախագահի այցը Հայաստան, դրա մասին նաև նրանց լրատվամիջոցներն են ասել, նշվել է նրանց կողմից»,- ասաց Շարմազանովը:

Անդրադառնալով հարցին, որ ադրբեջանական SOCAR ընկերությունը ցանկանում է գնել Վրաստանի «Նավթի ու գազի կորպորացիա» պետական ընկերության ակցիաների 25 տոկոսը, նա նշեց, որ այդ հարցի վերաբերյալ վարչապետ Կարապետյանը ԱԺ-ում պատասխանել է պատգամավոր Շիրակ Թորոսյանի հարցին` շատ լակոնիկ և շատ ամբողջական, և ինքը ավելացնելու բան չունի:

Նշենք, որ վարչապետն ասել էր. «Եթե նման զարգացում լինի, մենք գիտենք, թե ինչ արգումենտներ ունենք` մեր հարևան երկրի հետ խոսելու։ Եթե 25 տոկոս սեփականությունը վաճառելու դեպքում մենք անհանգստություն արտահայտենք, ապա վտանգ ունենք առնվազն ոչ կոռեկտ գտնվելու, որովհետև դա իրենց սեփականությունն է, և իրենք մեկ քառորդն են վաճառում, բայց եթե զարգացումներ լինեն, մենք մեր արգումենտները կներկայացնենք»։