Առաջիկա ամսին սպասվում է Իրանի փոխնախագահի այցը Հայաստան

Այսօր տեղի ունեցավ ՀՀ-ում Իրանի դեսպան Մոհամմադ Ռեյիսիի մամուլի ասուլիսը, որի ընթացքում խոսվեց Իրանի նկատմամբ պատժամիջոցների վերացման և հայ-իրանական հարաբերությունների ընթացքի մասին:

Թե ի՞նչ հնարավորությունների դռներ են բացվում Իրանի համար պատժամիջոցների փուլ առ փուլ չեղարկումից հետո, դեսպանը նշեց, որ միջազգային հանրությանը հասկանալի դարձավ, որ Իրանի միջուկային ծրագիրը զուտ խաղաղ նպատակների համար էր, և ՄԱԿ-ի Անվտանգության խորհուրդը համաձայնություն հայտնեց, որ Իրանը հարստացնի ուրան:

Իսկ թե պատժամիջոցների կասեցումը կոնկրետ ի՞նչ ազդեցություն  կարող է ունենալ Հայաստան-Իրան հարաբերությունների վրա, դեսպանը պատասխանեց, որ բարձր մակարդակի հանդիպումներ են սպասվում Իրանի ու Հայաստանի միջև, Իրանը կկարողանա իր հարաբերությունները հարևանների հետ էլ ավելի զարգացնել:

«Մենք Հայաստանի հետ շատ լավ հարաբերություններ ունենք: Այդ հարաբերություններն էլ ավելի կզարգանան, բարձրաստիճան երկկողմանի այցեր անպայման կլինեն: Իրանի փոխնախագահն առաջիկա ամսին Հայաստան կայցելի` ի պատասխան Հովիկ Աբրահամյանի` Իրան կատարած այցի: Եվ այդ այցելությունն անպայման իր դրական ազդեցությունը կունենա Հայաստան-Իրան հարաբերությունների վրա»,- ասաց ԻԻՀ դեսպանը: