Այս տարվա 7 ամսվա ընթացքում Հայաստան է ներմուծվել շուրջ 70 հազար մեքենա, մինչդեռ 2018-ին՝ 67 հազար

2018թ-ին ներմուծվել է մոտ 67.000 ավտոմեքենա, մինչդեռ 2019-ի 7 ամսվա կտրվածքով այդ ցուցանիշն արդեն կհատվի և կունենանք մոտ 70.000 ձևակերպում: Նման վիճակագրություն է ներկայացրել Պետական եկամուտների կոմիտեի նախագահի տեղակալ Շուշան Ներսիսյանը։

«Այս մեծաքանակ ներմուծումները պայմանավորված են 2020թ-ից ԵՏՄ միասնական մաքսային դրույքաչափին անցում կատարելու հանգամանքով», -նշել է Ներսիսյանը և Ֆեյսբուքի իր էջում ներկայացրել այդ ոլորտում կատարված աշխատանքներն ու սպասվող փոփոխությունները:

   Կատարված աշխատանքներ

Կանխատեսելով ներմուծման աճը՝ 2019թ հունվար ամսից սկսած Նորագավիթում տեղակայված բաժինների համար սահմանեցինք վեցօրյա աշխատանքային շաբաթ, ինչպես նաև ավելացրեցինք 5 ձևակերպող տեսուչ: Սրան զուգահեռ սկսեցինք նաև բավականին ակտիվ ավտոմեքենաներ ձևակերպել հանրապետության բոլոր մաքսատներում, ինչպես նաև ավտոմեքնաների բեռնաթափում իրականացնել մաքսային պահեստներում: Այսօրվա դրությամբ օրական մոտ 700 ավտոմեքենա է ձևակերպվում ՀՀ-ում, որից մոտ 500-ը՝ Նորագավիթում:

Սպասվող փոփոխություններ

Օգոստոսի 1-ից Նորագավիթի բաժիններում աշխատելու են յոթօրյա գրաֆիկով և այս նպատակով ավելացվելու է ևս 6 աշխատակից

-մաքսային պահեստներում բեռնաթափման աշխատանքներ իրականացվելու են նաև շաբաթ-կիրակի օրերին

-«Մետեքսիմ» մաքսային պահեստը կահավորվել է և շատ կարճ ժամկետներում ավտոմեքենաներ կձևակերպվեն նաև հենց այս պահեստում

«Ուզում եմ նշել, որ այս ամենին համալիր լուծում տալու նպատակով շատ կարևոր է Վարչապետի՝ ավտոմաքսատունը Գյումրի տեղափոխելու հանձնարարականը, որտեղ կապահովվեն բոլոր անհրաժեշտ պայմանները և կստեղծվեն համապատասխան ենթակառուցվածքներ ավտոմեքենան արագ և հեշտ մաքսազերծելու և հաշվառելու համար: Հանձնարարականի առնչությամբ լայնածավալ աշխատանքներն արդեն մեկնարկել են և, ինչպես Վարչապետը հայտարարեց, ավտոմաքսատունն արդեն տեղափոխված կլինի Գյումրի մինչև տարեվերջ»,-ամփոփել է Ներսիսյանը: